Rohit Arya, who held 20 children hostage in Mumbai, finally ‘encountered’ मुंबई (30 ऑक्टोबर 2025) : मुंबईच्या पवई परिसरातील रा स्टुडिओमध्ये तब्बल 20 चिमुकल्यांना ओलीस ठेवून विविध मागण्या करणार्‍या रोहित आर्यचा पोलिसांनी एन्काउंटर केल्याने खळबळ उडाली आहे. मृतदेह सेव्हन हिल्स रुग्णालयात हलवण्यातआला असून पोलिसांनी सर्व ओलिसांची सुरक्षीत सुटका केली आहे.
असे आहे नेमके प्रकरण ?
मुंबईतील पवई परिसरातील रा स्टुडिओमध्ये गुरुवारी दुपारी 1.45 वाजता युट्यूबर रोहित आर्यने 17 मुले, एका ज्येष्ठ नागरिक आणि एका नागरिकाला ओलीस ठेवले होते. विशेष म्हणजे वेब सिरीजच्या ऑडीशनसाठी या चिमुकल्यांना बोलावून बंधक बनवण्यात आले. पोलिस आणि विशेष कमांडोंनी त्याला गोळ्या घालून सर्व ओलिसांना सुरक्षितपणे वाचवले. या गोळीबारात आरोपी जखमी झाला होता. त्याला उपचारासाठी रुग्णालयात दाखल करण्यात आले मात्र उपचारादरम्यान त्याचा मृत्यू झाला.
तासभर चालली कारवाई
पोलिसांची ही कारवाई एक तास चालली. घटनास्थळावरून एअर गन आणि रसायने जप्त करण्यात आली. तथापि, आरोपी रोहित आर्यचा हेतू अद्याप अज्ञात आहे. पोलिसांच्या म्हणण्यानुसार, आरोपीने 100 हून अधिक मुलांना ऑडिशन्ससाठी बोलावले होते. रा स्टुडिओच्या पहिल्या मजल्यावर अभिनयाचे वर्ग आयोजित केले जातात, जिथे मुलांना ओलीस ठेवण्यात आले होते. घटनेदरम्यान, मुले स्टुडिओच्या खिडक्यांमधून बाहेर डोकावताना दिसली. मुलांचे पालकही आले आहेत.
बाथरूममधून एन्ट्री करून मुलांची सुटका
पवई पोलिसांनी कारवाईची माहिती देताना सांगितले की, दुपारी पावणे दोन वाजता एका व्यक्तीने महावीर क्लासिक नावाच्या बिल्डिंगमध्ये काही लहान मुलांना बंधक बनवून ठेवल्याचा पवई पोलिस ठाण्यात कॉल आला होता. या कॉलला तात्काळ प्रतिसाद देत विशेष पथकांना घटनास्थळी बोलावण्यात आले. आमच्या स्पेशल पथकाने मुलांना बंधक बनवण्यार्‍या व्यक्तीशी प्राथमिक बोलणे सुद्धा केले. या नंतर आमच्या पवई पोलिस ठाण्याच्या अधिकार्‍याने या इमारतीच्या बाथरूममधून फोर्स एंट्री करून आतील एका नागरिकाच्या मदतीने सर्व मुलांची सुखरूपणे सुटका केली आहे. यात एकूण 17 मुले, एक वृद्ध माणूस आणि एक नागरिक होते.
