Retired bank official in Bhusawal duped of Rs. 3.5 lakh भुसावळ (31 ऑक्टोबर 2025) : हयातीचा दाखला ऑनलाईन करण्याच्या बहाण्याने शहरातील सेवानिवृत्त बँक अधिकार्‍याला साडेतीन लाखांचा गंडा घालण्याचा प्रकार समोर आल्याने खळबळ उडाली आहे. फसवणूक करणार्‍यांनी अवघ्या 15 मिनिटांत त्यांच्या खात्यातील रक्कम वळवल्याने शहर पोलिसात फसवणुकीचा गुन्हा दाखल करण्यात आला.
असे आहे फसवणूक प्रकरण?
भुसावळ शहरातील डी.एस. ग्राउंड परिसरात रहिवासी हे बँक ऑफ बडोदामधून निवृत्त झालेले अधिकारी आहेत. फेसबुकवर हयातीचा दाखला ऑनलाईन करा, घरबसल्या सोयीस्कर सेवा अशी जाहिरात पाहून त्यांनी संबंधित लिंक उघडली. त्यात बँकेचे नाव, शाखा आणि मोबाईल क्रमांक यासंबंधीची माहिती भरली. ही घटना 23 सप्टेंबर रोजी घडली. यानंतर 24 ऑक्टोबर रोजी झारखंड येथून स्वतःला वेरिफिकेशन अधिकारी सांगणार्‍या भुपेंद्रदास गुप्ता नावाच्या इसमाचा फोन आला. तुम्ही पाठवलेली माहिती पडताळायची आहे ,असे सांगत त्याने व्हॉट्सअ‍ॅपवर कॉल केला. त्यादरम्यान मेल आयडी आणि पासवर्ड विचारून फोन सुरू ठेवा. अशी सूचना केली. काही मिनिटांतच त्यांच्या खात्यातील तीन लाख 56 हजार रुपयांपैकी तीन लाख 50 हजार रुपये ऑनलाईन ट्रान्सफर करण्यात आले.
बँकेत धाव मात्र रक्कम लांबवली
आपल्या बॅक खात्यातून पैसे ट्रान्सफर झाल्याच्या घटनेची माहिती मिळताच संबंधितांनी तत्काळ बँक ऑफ बडोदा शाखेत धाव घेतली आणि मुंबई मुख्यालयातही कळवले मात्र तोपर्यंत संपूर्ण रक्कम भामट्यांनी काढली. या प्रकरणी जळगाव येथे सायबर सेल येथे तक्रार करण्यात आली आहे. ही तक्रार भुसावळ शहर पोलिस ठाण्यात वर्ग करण्यात आल्यानंतर गुन्हा दाखल झाला. तपास पोलिस निरीक्षक उध्दव डमाळे यांच्या मार्गदर्शनाखाली सुरू आहे.
