धुळे विधानसभा निवडणुकीत 11 हजार मृत मतदारांचे मतदान! माजी आमदार अनिल गोटेंचा दावा
11,000 dead voters cast their votes in Dhule assembly elections! Former MLA Anil Goten claims धुळे (1 नोव्हेंबर 2025) : धुळे विधानसभेच्या 2024 मधील निवडणुकीत 11 हजार मृत मतदारांनी मतदान केल्याचा प्रकार समोर आल्याची माहिती माजी आमदार अनिल गोटे यांनी माध्यमांना दिली. ते म्हणाले. धुळे विधानसभा निवडणुकीतील (2024) मतदार यादीची छाननी केल्यावर तब्बल 45 हजार मतदारांची नावे बेकायदेशीर मार्गाने समाविष्ट करण्यात आली असून 11 हजार मतदारांनी मृत्यू पश्चात मतदान केल्याचा धक्कादायक प्रकार उघडकीस आला. या संदर्भात राज्य निवडणूक आयोगाकडे तक्रार दाखल करण्यात आल्याचे त्यांनी सांगितले.
लवकरच धुळे महापालिकेची निवडणूक
शिवसेनेचे (उबाठा) ज्येष्ठ नेते तथा माजी आमदार अनिल गोटे म्हणलो की, सर्वोच्च न्यायालयाच्या आदेशानुसार राज्यातील सर्व स्थानिक स्वराज्य संस्थांच्या निवडणुका पार पडणार आहेत. त्यानुसार धुळे महानगरपालिकेचीही निवडणूक प्रक्रिया लवकरच सुरू होणार आहे. भारतीय राज्यघटनेनुसार निवडणूक पारदर्शक व स्वच्छ वातावरणात पार पडणे अत्यावश्यक आहे. यासाठीच राज्य निवडणूक आयोगाची स्थापना आहे. निवडणुकीतील सर्वात महत्त्वाचा घटक म्हणजे मतदार यादी, जी अचूक आणि शुद्ध असणे आवश्यक आहे मात्र धुळे विधानसभा 2024 च्या निवडणुकीतील मतदार यादीची छाननी केल्यावर गंभीर अनियमितता आढळून येते. साधारणतः 45 हजार मतदारांची नावे बेकायदेशीर मार्गाने यादीत समाविष्ट करण्यात आल्याची माहिती मिळाली असून, या संदर्भात राज्य निवडणूक आयोगाकडे तक्रार दाखल करण्यात आली आहे.
बीएलओंकडून बेकायदेशीर नोंदणी
धुळे विधानसभा मतदारसंघात निवडणुकीपूर्वी सुमारे 27 हजार दुबार व तिबार मतदारांची नोंदणी बीएलओंनी (बुथ लेव्हल ऑफिसर्स) बेकायदेशीरपणे केल्याचे ते म्हणाले. धुळे महानगरपालिकेने दिलेल्या आकडेवारीनुसार अंदाजे 14 हजार 500 मृत व्यक्तींची नावे अजूनही मतदार यादीत असल्याचे उघड झाले परंतु मागील दहा वर्षांत केवळ तीन हजार 171 मतदारांना मृत म्हणून वगळण्यात आले आहे. यावरून सुमारे 11 हजार मृत मतदारांची नावे अजूनही यादीत कायम असल्याचे दिसून येतात.
मतदार यादीत प्रचंड त्रृटी
धुळे महानगरपालिकेच्या प्रभागांची यादी तयार करताना काही ठिकाणी एका प्रभागातील मतदार दुसर्‍या प्रभागात नोंदले गेले आहेत तसेच वेगवेगळ्या कुटुंबातील मतदारांची नावे एकाच पत्त्यावर आढळल्याने यादी तयार करण्याच्या प्रक्रियेत मोठ्या प्रमाणावर त्रृटी झाल्या असल्याचे स्पष्ट होते. या सर्व बाबींची सखोल चौकशी करून योग्य दुरुस्ती केल्याशिवाय धुळे महानगर पालिकेच्या सार्वत्रिक निवडणुकांचा कार्यक्रम जाहीर करू नये अन्यथा त्याचे परिणाम भोगावे लागतील, असा गर्भित इशाराही त्यांनी यावेळी दिला.
