भुसावळात बॉटनिकल गार्डनचे काम अपूर्ण असतानाच केले मंंत्र्यांनी लोकार्पण
परवानगी विना कामांची माहिती अधिकार कार्यकर्ते दिनेश उपाध्याय यांची शासनाकडे तक्रार
Ministers inaugurated the botanical garden in Bhusawal even though the work was incomplete भुसावळ (2 नोव्हेंबर 2025) : भुसावळ शहरातील जलाल शाह बाबा परिसरात पालिकेने बॉटनिकल गार्डनला शासनाची विविध विभागाची परवानगी नसल्याने संबंधित अधिकारी यांच्यावर कारवाई करण्यात यावी तसेच हे काम अपूर्ण असतानाही लोकार्पण करण्यात आल्याची तक्रार माहिती अधिकार कार्यकर्ते दिनेश उपाध्याय यांनी शासनाकडे केली आहे.
काय आहे नेमके प्रकरण ?
नगरपरिषदेकडून बॉटनीकल गार्डनसाठी ज्या ठेकेदाराला काम देण्यात आले, त्या ठेकेदाराला यापूर्वी कोणत्याही प्रकारच्या बॉटनिकल गार्डन बांधण्याचा अनुभव नाही. यासोबतच शासनाच्या परवानगी घेतल्या नाहीत. बॉटनिकल गार्डन असे नाव असताना या ठिकाणी केवळ मुरूम टाकून जॉगींग ट्रॅक तयार करण्यात आला आहे. पालिकेकडून गार्डनचे काम अपूर्ण असल्याचे सांगितले जाते? जर काम अपूर्ण आहे, तर वस्त्रोद्योग मंत्री संजय सावकारे यांच्याहस्ते या गार्डनचे उद्घाटन कसे झाले? असा प्रश्नही दिनेश उपाध्याय यांनी मांडला आहे.
एकंदरीत या कामात आर्थिक गैरव्यवहार झालेला असून संबंधित अधिकारी व ठेकेदारावर तातडीने कारवाई करण्यात यावी, अशी मागणी शासनाकडे केली आहे.
परवानगी घेतली नाही
बॉटनिकल गार्डन उभारण्यासाठी स्थानिक नियोजन प्राधिकरणाकडून विकास, बिल्डिंग परवाना, विकास आराखड्यातील झोनिंग सुसंगती, झाडे कापणे, स्थानांतर परवानगी, पर्यावरणीय परवानगी,जल-अपशिष्ट व्यवस्थापनासाठी आवश्यक नाहरकत, एमआरटीपी कायदा अंतर्गत विकास परवाना, आराख मंजुरी आदींसह अनेक परवानगी लागते. या घेतल्या गेल्या नाहीत. तसेच काम अपूर्ण असतानाही लोकार्पण करण्यात आल्याचे उपाध्याय यांनी तक्रारीत म्हटले आहे.
तक्रारीची चौकशी करणार
पालिका प्रशासनाकडे आलेल्या तक्रारीवर आम्ही कागदपत्रांची तपासणी करीत आहोत. केवळ तक्रार केली म्हणजे कामात गैरव्यवहार किंवा परवानगी नाही? असे होत नाही. तक्रारदाराच्या तक्रारीच्या अनुषंगाने चौकशी करुन पुढील प्रक्रिया राबविण्यात येणार असल्याचे पालिकेचे बांधकाम अभियंता पंकज मदगे म्हणाले.
