माजी मंत्री एकनाथराव खडसेंच्या बंगल्यात चोरी : मुंबईतील सराफासह त्रिकूट जाळ्यात
रामानंद पोलिसांची कामगिरी : तीन पसार आरोपींचा कसून शोध
Theft in former minister Eknathrao Khadse’s bungalow: Trio including Mumbai goldsmith जळगाव (3 नोव्हेंबर 2025) : माजी मंत्री आमदार एकनाथराव खडसे यांच्या जळगावातील मुक्ताई बंगल्यात घरफोडी होवून महत्त्वाची कागदपत्रे, पेन ड्राईव्ह व सुमारे सात लाखांचा ऐवज लांबवण्यात आला होता. याप्रकरणी रामानंद पोलिसांनी तीन आरोपींना अटक करीत सहा 6 लाख 21 हजारांचा मुद्देमाल जप्त केला आहे तर तीन मुख्य आरोपी पसार असून त्यांचा कसून शोध सुरू आहे. दरम्यान, अटकेतील आरोपींमध्ये जळगावसह कल्याणमधील सराफाचा समावेश आहे.
काय घडले जळगावात ?
27 ऑक्टोबरच्या रात्रीपासून 28 ऑक्टोबरच्या सकाळपर्यंत मुक्ताई बंगला बंद असताना अज्ञात चोरट्यांनी कुलूप तोडून घरात प्रवेश केला. त्यांनी घरातील सोन्या-चांदीचे दागिने आणि रोख रक्कम असा सुमारे 6 लाख 70 हजार रुपयांचा मुद्देमाल लंपास केला होता. या प्रकरणी चेतन सुरेश देशमुख यांनी फिर्याद दिल्यानंतर रामानंद पोलिसात गुन्हा दाखल होता.
स्थानिक आरोपीसह तिघे जाळ्यात
पोलिसात तपासादरम्यान फुटेजद्वारे सुजुकी दुचाकी (एम.एच.19 ई.आर.5539) जप्त केली व वाहन मालकाला चौकशीसाठी बोलावल्यानंतर त्याने आपल्या नातेवाईकांनी बंगल्यात चोरी केल्याची कबुली दिली. सुरूवातीला जियाउद्दीन हुस्नोददीन शेख (वय 39, रा. मास्टर कॉलनी, जळगाव) याला पोलिसांनी अटक केली व तपासात संशयित चिराग इकबाल सैय्यद (22, रा.उल्हासनगर) याच्याकडे घरफोडतील मुद्देमाल असल्याची माहिती मिळाल्यानंतर त्यास अटक करण्यात आली तर आरोपीने चोरीचा मुद्देमाल उल्हासनगर येथील सराफा कैलास हिराचंद खंडेलवार (48, रा.कल्याण) यास विकल्याने त्यासदेखील अटक करण्यात आली. आरोपींच्या ताब्यातून सहा लाख 21 हजार रुपयांचा मुद्देमाल जप्त करण्यात आला.
हा मुद्देमाल जप्त
आरोपींकडून 31.970 ग्रॅम वजनाची सोन्याची लगड, विविध सोन्याचे दागिने, अंगठ्या, चैन, कानातील रिंग तसेच 217 ग्रॅम वजनाची चांदीची गणपती मूर्ती जप्त करण्यात आली.
तीन मुख्य आरोपी पसार
घरफोडीत मोहम्मद बिलाल उर्फ बिल्ला अब्दुल करीम चौधरी, एजाज अहमद उर्फ सलीम अब्दुल चौधरी आणि ‘बाबा’ (पूर्ण नाव माहीत नाही) हे उल्हासनगर, मुंबई येथील रहिवासी असून ते पसार झाले आहेत. या आरोपींविरुद्ध मुंबई व गुजरात राज्यातील विविध ठाण्यांमध्ये 20 पेक्षा अधिक चोरी आणि घरफोडीचे गुन्हे दाखल आहेत.
यांनी आवळल्या आरोपींच्या मुसक्या
ही कारवाई रामानंद पोलिस निरीक्षक राजेंद्र गुंजाळ यांच्या मार्गदर्शनाखाली सहाय्यक पोलिस उपनिरीक्षक सचिन रणेशवरे, सुशील चौधरी, जितेंद्र राजपूत, विनोद सुर्यवंशी, स्थानिक गुन्हे शाखेचे शरद बागल, अक्रम शेख, प्रीतम पाटील आदींच्या पथकाने केली.
