बाजार समित्यांनी केळी बाजारभाव नियंत्रणासाठी व्यापार्‍यांची दप्तर तपासणी करा : यावलला उपजिल्हा निबंधकांचे निर्देश
यावल बाजार समितीत केळी बाजार भाव संदर्भात बैठकीत दिल्या सूचना
यावल (4 नोव्हेंबर 2025) : बाजार समित्यांनी केळी बाजारभाव नियंत्रणासाठी व्यापार्‍यांची दप्तर तपासणी करावी, असे निर्देश उपजिल्हा निबंधक गौतम बलसाणे यांनी दिले. ते सोमवारी सायंकाळी यावल बाजार समितीत केळी बाजार भाव संदर्भात बाजार समिती व व्यापारी यांच्या बैठकीत बोलत होते.
यावल कृउबात बैठक
यावल कृषी उत्पन्न बाजार समितीच्या सभागृहात झालेल्या बैठकीच्या अध्यक्षस्थानी जिल्हा उपनिबंधक गौतम बलसाणे होते. केळी बाजारभावातील तफावत दूर करण्यासाठी 3 रोजी शेतकरी, बाजार समिती व व्यापारी यांची संयुक्त बैठक बोलाविण्यात आली. केळी भावातील बोर्डावर घोषित दर आणि प्रत्यक्ष खरेदी यात निम्म्याहून अधिक तफावत आहे. यासंबंधी यावल बाजार समितीच्या वतीने जिल्हा उपनिबंधक, सहकारी संस्था, जळगाव यांच्याकडे प्रस्ताव पाठविण्यात आला.. त्या अनुषंगाने या बैठकीचे आयोजन करण्यात आले होते.
हिशेब पट्टी बंधनकारक
संपूर्ण जिल्ह्यातील शेतकरी आज याच समस्येचा सामना करीत असून सर्व बाजार समित्यांनी एकसमान हिशेब पट्टी व्यापार्‍यांना देणे बंधनकारक करावी, व्यापार्‍यांचे नियमित दप्तर तपासणी करावी, त्याचप्रमाणे बाजार समितीच्या वांधा समितीच्या माध्यमातून व्यापार्‍यांवर कडक निर्बंध लावावेत. सर्वात महत्वाचे म्हणजे व्यापार्‍यांनी नैतिकता पळून व्यवहार करणे देखील महत्वाचे असल्याचे ते म्हणाले. त्याच प्रमाणे संपूर्ण जिल्ह्यासाठी बाजारभाव घोषित करणारी समिती असणे अत्यंत आवश्यक आहे, असेही त्यांनी नमूद केले.
यांची होती उपस्थिती
बाजार समिती संचालक पंकज चौधरी, उज्जैनसिंग राजपुत, सागर महाजन, सुनील बारी यांनी देखील शेतकर्‍यापुढील समस्या विषद केल्या. यावेळी मोठ्या संख्येने व्यापारी देखील उपस्थित होते. जिल्ह्यातील सर्व बाजार समित्यांच्या पदाधिकार्‍यांची लवकरच केळीच्या प्रश्नावर तोडगा काढण्यासाठी बैठक लावू असे आश्वासन जिल्हा उपनिबंधक बलसाणे यांनी दिले.
केळी निर्यात सुविधा केंद्र
पाडळसा येथे केळी निर्यात सुविधा केंद्र सुरु करण्यासाठी प्रस्ताव सादर करण्यात आलेला आहे, त्याच्यावर कार्यवाही व्हावी. यावर, भविष्यामध्ये यावल येथे केळीसाठी निर्यात सुविधा केंद्र उभारणी करण्यासाठी शासन गतिशील आहे, त्याचा फायदा शेतकर्‍यांना व येथील व्यापार्‍यांना मिळावा अशी मागणी देखील करण्यात आली.
लिलावातील त्रृटी दूर करण्याबद्दल जिल्हाधिकार्‍यांच्या सूचना
केळी भावाच्या संदर्भात बर्‍हाणपूर बाजार समितीशी जिल्हाधिकारी यांच्या माध्यमातून चर्चा झाली होती. तेथील लिलावातील त्रुटी दूर करण्याबद्दल जिल्हाधिकार्यांनी सूचना देखील केल्या होत्या. बाजार समित्यांनी व्यापार्‍यांना लायसेन्स देतांना बँक गॅरंटी घेणे गरजेचे असल्याचे देखील उपनिबंधकांनी यावेळी सांगितले.
शेतकर्‍यांच्या समस्या
यावेळी शेतकर्‍यांना भेडसावणार्‍या समस्या बद्दल सभापती राकेश फेगडे यांनी विवेचन केले. पूर्वी रास फरक पद्धतीने बाजारभाव रावेर बाजार समिती घोषित करत होती, त्यावेळी शेतकर्‍यांना त्यांच्या मालाच्या गुणवतेनुसार भाव व भाव फरक मिळत होता. रास फरक मिळायला लागल्यास शेतकरी चांगल्या दर्जाचा माल पिकवणे सुरु करतील. मात्र, काही व्यापार्‍यांनी संघटीतपणे ही पद्धत बंद पाडली, असे त्यांनी सांगितले.
