भुसावळात रेल्वे स्थानकाच्या परिसरात संशयीतांची चौकशीअंती रेल्वेतील चोरी उघड
Railway theft uncovered after questioning of suspects near Bhusawal railway station भुसावळ (7 नोव्हेंबर 2025) : भुसावळ रेल्वे स्टेशन परिसरात संशयास्पदरीत्या फिरणार्या दोन व्यक्तींना आरपीएफच्या गुन्हे रोख पथकाने ताब्यात घेत त्यांची चौकशी केल्यानंतर रेल्वेत झालेल्या पाकिटचोरीचा धागा लागला आहे. आरपीएफतर्फे ऑपरेशन‘यात्री सुरक्षा अंतर्गत ही कारवाई करण्यात आली.
संशयीत यंत्रणेच्या जाळ्यात
आरपीएफतर्फे दिलेल्या माहितीनुसार, आरपीएफचे कर्मचारी देवेंद्र दीक्षित व पंकज राऊत हे भुसावळ स्टेशनवर गस्त घालत असताना प्लॅटफॉर्म एकवर दोन व्यक्ती संशयास्पद हालचाली करताना दिसले. त्यांना थांबवून चौकशी केली असता समाधानकारक उत्तर न दिल्याने त्यांना आरपीएफ ठाण्यात आणण्यात आले. त्यांची चौकशी केली असता, त्या चौकशीत त्यांनी झेलम एक्स्प्रेस या गाडीच्या ए-1 कोचमध्ये एका प्रवाशाचे पाकीट चोरल्याचे कबूल केले मात्र पाकिटात मौल्यवान वस्तू नसल्याचे लक्षात आल्यानंतर ते फेकून दिल्याची माहिती त्यांनी दिली. यावेळी दोघांना पुढील कारवाईसाठी जीआरपी भुसावळ यांच्या ताब्यात देण्यात आले. आरपीएफच्या सतर्कतेमुळे चोरट्यांच्या मुसक्या आवळता आल्या.
