भुसावळ (8 नोव्हेंबर 2025) : शहरातील दादासाहेब देविदास नामदेव भोळे महाविद्यालयात शुक्रवार, 7 नोव्हेंबर रोजी सकाळी 10 वाजता विद्यार्थी विकास विभाग यांच्या विद्यमाने वंदे मातरमचे सामूहिक गायन करण्यात आले. महाविद्यालयाचे प्राचार्य डॉ.राजू फालक अध्यक्षतेस्थानी होते.
पर्यटन व सांस्कृतिक कार्य विभाग, महाराष्ट्र शासन व कवयित्री बहिणाबाई चौधरी उत्तर महाराष्ट्र विद्यापीठ, जळगाव यांच्या मार्गदर्शक सुचनेनुसार वंदे मातरम सामुहिक गायन कार्यक्रम आयोजित करण्यात आला. प्रा.डॉ.राजू फालक यांनी मार्गदर्शनात सांगितले की, त्यांनी वंदे मातरम गीताला 150 वर्ष पूर्ण झाले आहेत. त्यानिमित्त केंद्र सरकार, राज्य सरकार व विद्यापीठाची काय भूमिका आहे ती भूमिका विशद करण्यात आली.
भारताचे राष्ट्रीयगान ‘वंदे मातरम’ला 7 नोव्हेंबर 2025 रोजी 150 वर्षे पूर्ण झाली आहेत. बंकिमचंद्र चट्टोपाध्याय यांनी 1875 मध्ये हे अजरामर गीत लिहिले होते. इंग्रज सरकारने ‘गॉड सेव्ह द क्वीन’ हे गीत भारतीय शाळा आणि सैन्यात अनिवार्य करण्याचा प्रयत्न केला, तेव्हा त्याला पर्याय म्हणून त्यांनी या देशभक्तीपर गीताची रचना केली.हे गीत सर्वप्रथम त्यांच्या ‘बंगदर्शन’ या साहित्यिक नियतकालिकात प्रकाशित झाले. नंतर 1882 मध्ये प्रकाशित झालेल्या त्यांच्या प्रसिद्ध कादंबरी ‘आनंदमठ’मध्ये या गीताचा समावेश करण्यात आला. वंदे मातरम’ हे गीत भारतीय स्वातंत्र्यलढ्याचे घोषवाक्य बनले. या गीताने कोट्यवधी भारतीयांच्या मनात देशभक्तीची ज्योत पेटवली आणि अनेक क्रांतिकारकांनी ‘वंदे मातरम’चा नारा देत प्राणांची आहुती दिली.
स्वातंत्र्यानंतर 24 जानेवारी 1950 रोजी भारताच्या संविधान सभेने ‘वंदे मातरम’ या गीताला भारताचे राष्ट्रीय गीत म्हणून अधिकृतपणे स्वीकारले. या 150 व्या वर्षानिमित्त देशभरात विविध कार्यक्रमांचे आयोजन केले जात आहे आणि यानिमित्ताने नागरिकांना, विशेषतः तरुणांना, या गीताच्या मूळ आणि क्रांतिकारी भावनेशी जोडण्याचा प्रयत्न केला जात आहे.
यांची कार्यक्रमाला उपस्थिती
या कार्यक्रमांला महाविद्यालयातील विद्यार्थी विकास अधिकारी प्रा.डॉ.संजय चौधरी, सहाय्यक विद्यार्थी विकास अधिकारी प्रा.एस.डी.चौधरी, प्रा.डॉ.अनिल सावळे, रासेयो अधिकारी प्रा.डॉ.जगदीश चव्हाण, प्रा.डॉ.आर.बी.ढाके, प्रा.डॉ.एस.व्ही.बाविस्कर, प्रा.आर.डी.भोळे, प्रा.डॉ.जी.पी.वाघुळदे, प्रा.श्रेया चौधरी, प्रा.संगीता धर्माधिकारी, प्रा.डॉ.माधुरी पाटील, प्रा.दीपककुमार जैस्वार, प्रा.डॉ.एस.एस.पाटील, प्रा.खिलचंद धांडे, प्रा.डॉ.डी.एस.राणे, प्रकाश सावळे, सुनील ठोसर, प्रकाश चौधरी, प्रमोद नारखेडे, सुधाकर चौधरी आदी शिक्षक-शिक्षकेत्तर कर्मचारी पदवी व पदव्युत्तर पदवी अभ्यासक्रमांचे विद्यार्थी मोठ्या संख्येने उपस्थित होते.
