भुसावळ (8 नोव्हेंबर 2025) : भारतीय घटनेचे शिल्पकार भारतरत्न डॉ.बाबासाहेब आंबेडकर यांच्या शाळा प्रवेश दिनाच्या स्मरणानिमित्त शुक्रवार, 7 नोव्हेंबर रोजी के.नारखेडे विद्यालयात विद्यार्थी दिन उत्साहात साजरा करण्यात आला.
विविध स्पर्धांचे आयोजन
विद्यालयातील सकाळ शाखा व दुपार शाखांतर्फे काव्य वाचन स्पर्धा, वक्तृत्व स्पर्धा व निबंध स्पर्धा झाली. सकाळ शाखेला दिनकर हेलोडे, आर.डी.तायडे, महेश सुरवाडे यांनी सर्व स्पर्धांचे यशस्वीपणे आयोजन केले.
दुपार शाखेला एस.पी.महाजन यांनी काव्य स्पर्धेचे आयोजन केले तर निबंध स्पर्धेसाठी श्री.श.चिपळोणकर यांनी आयोजन केले. शुभांगी पाटील व रिता महाजन यांनी वक्तृत्व स्पर्धेचे आयोजन केले. याप्रसंगी संस्था सेक्रेटरी पी.व्ही.पाटील, विद्यालयाच्या प्रभारी मुख्याध्यापिका संगीता अडकमोल, पर्यवेक्षक सुनील राणे, सुनील पाठक, विज्ञान शिक्षक बी.बी.जोगी, एस.एस.कापसे व्यासपीठावर उपस्थित होते.
याप्रसंगी विद्यालयाच्या प्रभारी मुख्याध्यापिका संगीता अडकमोल व पर्यवेक्षक एस.पी.पाठक यांनी डॉक्टर आंबेडकर यांच्या जीवन व कार्य याविषयी विद्यार्थ्यांना अत्यंत महत्त्वपूर्ण माहिती दिली व विद्यार्थी दिनाचे महत्त्व अधोरेखित केले. या सर्व स्पर्धांसाठी विद्यालयातील एकूण शंभर विद्यार्थ्यांनी उत्स्फूर्तपणे सहभाग घेतला. यशस्वीतेसाठी माधव गरूडे, हेमांगी पाटील व विद्यार्थी चैतन्य सुभाष पाटील यांनी परिश्रम घेतले.
