भुसावळ (9 नोव्हेंबर 2025) : शहरातील जामनेर रोडवर वाहतूकीला अडचण ठरत असलेल्या वाहनधारक शहर वाहतूक शाखेच्या रडारवर आले आहे. शनिवारी वाहतूकीला अडचण ठरत असलेल्या 28 वाहनधारकांविरूध्द दंडात्मक कारवाई केली. 28 वाहनधारकांकडून 14 हजार रूपयांचा दंड वाहतूक शाखेकडून वसूल करण्यात आला.
कारवाई नियमित सुरू राहणार
शहरातील जामनेर रोडवर शनिवारी वाहतूक शाखेचे सहायक निरीक्षक उमेश महाले यांनी मोहिम राबविली. बाजारपेठ पोलिस ठाण्यापासून नहाटा चौफुलीपर्यत गस्त केली, यावेळी वाहतूकीला अडचण ठरत असलेल्या 28 वाहनांवर कारवाई केली. यात चार कार, 9 अ‍ॅटोरिक्षा, तीन हातगाड्या व अन्य मोटर सायकल याचा समावेश होता.
सहायक निरीक्षक महाले यांनी वाहनधारकांना समज दिली, ज्यांनी सूचनांकडे दुर्लक्ष केले, असा 28 वाहनधारकांविरूध्द कारवाई केली. यामुळे अन्य वाहनधारकांमध्ये खळबळ उडाली. पोलिसांच्या कारवाई मुळे रस्त्यात उभ्या असलेल्या वाहनधारकांनी तात्काळ त्याची वाहने रस्त्याच्या कडेला घेतली. निवडणूकीच्या पार्श्वभुमीवर वाहतूक शाखेतर्फे आता दररोज नित्याने कारवाई केली जाणार आहे. यावल रस्त्यावर सुध्दा सकाळच्या वेळी कारवाई करून रस्ता वाहतूकीला मोकळा करावा, अशी मागणी होत आहे.
