फरीदाबाद (10 नोव्हेंबर 2025) : हरियाणाच्या फरिदाबादमधून एका डॉक्टराच्या घरातून 300 किलो आरडीएक्स, एके 47 आणि दारूगोळा पकडण्यात आला आहे. पोलिसांनी दोन दिवसांपूर्वी अटक केलेल्या डॉक्टर आदिल अहमदनं सांगितलेल्या ठिकाणार ही कारवाई जम्मू काश्मिर पोलिसांनी केली.
काय आहे प्रकरण ?
8 नोव्हेंबरला श्रीनगर पोलिसांनी मोठी कारवाई करत अनंतनाग येथील सरकारी मेडिकल कॉलेजचे माजी डॉक्टर आदिल अहमद यांच्या लॉकरमधून एके 47 रायफल जप्त केली. त्यानंतर पोलिसांनी या प्रकरणात सखोल चौकशी सुरू केली. माहितीनुसार, आदिल अहमद अनंतनागमध्ये सीनियर रेजिडेंट डॉक्टर पदावर कार्यरत होता परंतु त्याच्या लॉकरमधून एके 47 बंदूक सापडल्यानंतर सुरक्षा यंत्रणांना त्याचे दहशतवादी संघटना जैशसोबत संबंध असल्याचा संशय आणखी बळावला.
पोलिसांनी जेव्हा तपास सुरू केला, तेव्हा डॉक्टरने सांगितलेल्या फरिदाबाद या ठिकाणी मोठ्या प्रमाणात आरडीएक्स पकडले. डॉक्टर आदिल अहमदच्या चौकशीत अनेक खुलासे समोर आले आहेत.
आदिल अहमदच्या चौकशीतून समोर आलेल्या ठिकाणांवर पोलिसांच्या टीमने धाड टाकली. त्याठिकाणी जवळपास 300 किलो आरडीएक्स,एक एके 47 आणि अनेक जिवंत काडतुसे जप्त केली. हे स्फोटक साहित्य एखाद्या मोठ्या दहशतवादी हल्ल्यात वापरले जाणार होते, असे पोलिसांनी म्हटलं.
आरोपी डॉक्टरचे संबंध पाकिस्तानातील दहशतवादी संघटनांशी होते. तो दीर्घ काळापासून दहशतवाद्यांना मदत करायचा. या संपूर्ण नेटवर्कमध्ये अनेक राज्याचे लोक सहभागी आहेत. येणार्‍या काळात या प्रकरणात आणखी काही अटक होण्याची शक्यता आहे. इतक्या मोठ्या प्रमाणात आरडीएक्स हरियाणापर्यंत कसे पोहचले आणि त्यांचे टार्गेट काय याचाही तपास केला जात आहे.
