भुसावळ नगराध्यपदाचा उमेदवार कोण असेल ? माजी आमदार संतोष चौधरींनी थेट नावेच सांगितली !
भुसावळ पालिका निवडणूक : महाविकास आघाडीचा उमेदवार 15 रोजी जाहीर करणार :माजी आमदार संतोष चौधरी
Who will be the candidate of Bhusawal Nagaradhya Party? Former MLA Santosh Chaudhary directly named the name! भुसावळ (10 नोव्हेंबर 2025) : भुसावळ पालिका निवडणुकीत भाजपाचा उमेदवार आधीच जाहीर असलातरी महाविकास आघाडी मात्र पक्षातील निष्ठावंत कार्यकर्ते व नेत्यांशी चर्चा करूनच 15 रोजी आपला उमेदवार जाहीर करेल, असे सुतोवाच राष्ट्रवादी शरद पवार गटाचे नेते व माजी आमदार संतोष चौधरी यांनी येथे केले. शनी मंदिर वॉर्डातील निवासस्थानी गेल्या दोन दिवसांपासून पक्षातील इच्छुकांच्या मुलाखती सुरू आहेत. या पार्श्वभूमीवर चौधरी यांनी माध्यमांशी संवाद साधताना सांगितले की, आमच्याकडे सहा उमेदवारांची नावे असून त्यातील एकाला आम्ही संधी देणार असून निश्चितपणे आम्हाला निवडणुकीत यश मिळेल, असा विश्वास त्यांनी व्यक्त केला.
जनतेनेच घेतली निवडणूक डोक्यावर
भुसावळ नगरपालिकेची निवडणूक खर्‍या अर्थाने जनतेने डोक्यावर घेतली आहे. गेल्या नऊ वर्षात शहराचा कशा पद्धत्तीने विकास झाला ? हे सर्वांना ठाऊक आहे त्यामुळे यंदाच्या निवडणुकीत आम्ही तरुण कार्यकर्त्यांना संधी देणार आहोत. ठेकेदार असलेल्या नगरसेवकांना आमच्याकडे उमेदवारी दिली जाणार नाही, असे त्यांनी ठासून सांगितले.
चौधरींनी थेट इच्छूकांची नावेच सांगितली
माजी आमदार चौधरी यांनी सांगितले की, भाजपाचा नगराध्यक्ष पदाचा उमेदवार आधीच ठरला असून आम्ही मात्र पक्षातील कार्यकर्ते व पदाधिकार्‍यांशी चर्चा करून 15 रोजी एका उमेदवाराचे नाव जाहीर करू. आमच्याकडे गायत्री रूपचंद भंगाळे, स्वाती कुणाल जंगले, उषा मनोहर तायडे, अ‍ॅड.प्रगती उल्हास पगारे, सौ.शोभा रामदास सावकारे इच्छूक असून त्यातील एकाच्या नावावर निश्चिती केली जाईल, असे त्यांनी सांगितले.
महाविकास आघाडीच्या माध्यमातून निवडणूक
महाविकास आघाडीतील घटक पक्ष असलेल्या उबाठासह काँग्रेसने आमच्याकडे जागांची मागणी केली असून याबाबतही निवडून येणार्‍या जागांवरच आम्ही वाटाघाटी करणार असून 15 रोजी नगराध्यक्ष पदासह नगरसेवक पदासाठी इच्छूक असलेल्यांची नावे आम्ही जाहीर करू. आमच्याकडे कुठलेही कंत्राटदार उमेदवार नाहीत, जे नागरिकांच्यासाठी रस्त्यावर उतरतील, अशांना आम्ही उमेदवारी देवू.
प्रत्येक नेता सोयीनेच बोलतो : दिलीप खोडपे
आमदार खडसेंचा राजीनामा घेण्यात आल्यची टीका आमदार अनिल पाटील यांनी केल्याच्या वक्तव्यावर जि.प.चे माजी अध्यक्ष दिलीप खोडपे यांनी सांगितले की, जुन्या गोष्टी उकरून काढण्यात अर्थ नाही. प्रत्येक नेता त्याच्या सोयीनुसार बोलतो. यावेळी वरणगावचे नगराध्यक्षपदाचे उमेदवार राजेंद्र चौधरी, विशाल नारखेडे, जयेश चौधरी आदींसह पदाधिकारी उपस्थित होते.
