मुक्ताईनगर तालुक्यात शेतकर्‍यांच्या शासकीय अनुदानावर डल्ला : कोतवाल, तलाठ्यासह चौघे निलंबित
Government subsidy for farmers in Muktainagar taluka was seized : Four people including Kotwal and Talatha suspended मुक्ताईनगर (11 नोव्हेंबर 2025) : नैसर्गिक आपत्तीमुळे झालेल्या नुकसानीच्या भरपाईत लाखोंचा गैरव्यवहार झाल्याचा प्रकार मुक्ताईनगर तालुक्यात समोर आला होता. आमदार चंद्रकांत पाटील यांनी महसूल विभागाला धारेवर धरत आरोप केल्यानंतर सुरूवातीला एका कोतवालाविरोधात गुन्हा दाखल होवून त्यास निलंबित करण्यात आले होते तर आता दोन तलाठी आणि एका क्लर्कला निलंबित करण्यात आल्याने प्रशासकीय वर्तुळात खळबळ उडाली आहे.
चौघांचे आतापर्यंत निलंबन
गैरव्यवहाराच्या पार्श्वभूमीवर मुक्ताईनगर तहसीलदार यांनी संबंधित तलाठ्यांच्या निलंबनाचा प्रस्ताव जिल्हाधिकार्‍यांकडे पाठवला होता. जिल्हाधिकारी रोहन घुगे यांनी कोतवाल, दोन तलाठी आणि एक क्लर्क अशा चौघांवर निलंबनाची कारवाई केल्याचे स्पष्ट केले.
सहा गावांमध्ये निधी वाटपात भ्रष्टाचार
या प्रकरणात सुरुवातीला आमदार चंद्रकांत पाटील यांनी फक्त राजुरा आणि बोरखेडा गावांतील अनियमिततेकडे लक्ष वेधले होते मात्र तपासात आता आणखी सहा गावांमध्ये भरपाई निधीच्या वाटपात मोठा गैरव्यवहार झाल्याचे समोर आले आहे.
शासनाने नैसर्गिक आपत्तीग्रस्त शेतकर्‍यांसाठी 24 कोटी 21 लाख 49 हजार 630 रुपयांची मदत मंजूर करून ती 19 हजार 216 शेतकर्‍यांच्या खात्यात जमा केली होती. मात्र चौकशीत असे समोर आले आहे की, काही ठिकाणी अस्तित्वात नसलेल्या शेतकर्‍यांच्या नावावर भरपाई दाखवण्यात आली, तर काही ठिकाणी कमी क्षेत्र दाखवून जास्त रक्कम घेतली गेली. या मार्गाने लाखो रुपयांचा अपहार करण्यात आल्याचे स्पष्ट झाले आहे.
प्राथमिक चौकशीत सुमारे 13 लाख 45 हजार रुपयांचा अपहार उघडकीस आला असून, आणखी चार गावांमध्ये बनावट लाभार्थ्यांना निधी वितरित झाल्याचा संशय व्यक्त केला जात आहे. परिणामी एकूण गैरव्यवहाराची रक्कम 40 ते 50 लाख रुपयांपर्यंत पोहोचण्याची शक्यता व्यक्त केली जात आहे.
या प्रकरणामुळे महसूल विभागातील पोर्टल प्रणालीतील त्रृटी उघड झाल्या आहेत. सदोष प्रणालीमुळे संबंधित अधिकार्‍यांना मनमानी करण्याची संधी मिळाल्याचे स्पष्ट झाले असून नागरिकांचे लक्ष आता चौकशीच्या पुढील टप्प्याकडे लागले आहे.
यांच्यावर निलंबनाची कारवाई
निलंबित कर्मर्‍यांमध्ये राहुल रवींद्र सोनवणे (कोतवाल), महेंद्र राजेंद्र वंजारी (तलाठी), कृष्णकुमार आर. ठाकूर (तलाठी) आणि मोनीश बेंडाळे (क्लर्क) यांचा समावेश आहे.
