भुसावळच्या विरेंद्र पाटील यांनी कृषी विभागाला दिले ‘नवे बोधचिन्ह’
लोगो बनवण्यात क्रेझी क्रिएशनने पटकावला प्रथम क्रमांक
Virendra Patil of Bhusawal gave a ‘new emblem’ to the Agriculture Department भुसावळ (11 नोव्हेंबर 2025) : शासनाच्या कृषी विभागाला तब्बल 38 वर्षांनंतर नवा लोगो आणि घोषवाक्य लाभले आहे. हा अभिनव लोगो भुसावळ येथील त क्रेझी क्रिएशनचे विरेंद्र भाईदास पाटील (50) यांनी साकारला आहे. नव्या बोधचिन्हातून निसर्ग, तंत्रज्ञान आणि विज्ञानाचा संगम प्रभावीपणे मांडण्यात आला आहे. एकात्मिक शेती विकास हा कृषी विभागाचा मुख्य संदेश त्यातून अधोरेखित होत आहे.
38 वर्षानंतर मिळाले नवीन बोधचिन्ह
मे 1987 मध्ये प्रथमच कृषी विभागाने आपले बोधचिन्ह वापरायला सुरुवात केली होती मात्र काळानुसार शेती आणि कृषी व्यवस्थापनात झालेल्या आमूलाग्र बदलांनंतरही तो जुना लोगोच वापरला जात होता. नव्या युगातील गरज लक्षात घेऊन कालसुसंगत आणि सर्जनशील प्रतीक असावे, या उद्देशाने हा नवा लोगो साकारण्यात आला आहे.
या बोधचिन्हात वरचा निळा थेंब आणि सूर्य जलसंवर्धन व उत्पादन क्षमता दर्शवतात तर हिरव्या पानांच्या चार विभागांत पशुपालन, नवसंकल्पना, यांत्रिकीकरण आणि वैज्ञानिक शेतीचे दर्शन घडते.
कार्पोरेट क्षेत्रातील हजारो लोगो डिझाईन
विरेंद्र पाटील हे मूळचे पारोळा तालुक्यातील इंधवे येथील असून त्यांचे वडील भाईदास पाटील आर.पी.डी. येथे नोकरीस असल्याने त्यांचे बालपण भुसावळमध्ये गेले. त्यांनी इंजिनिअरिंग डिप्लोमा घेतल्यानंतर ग्राफिक डिझाइनिंग क्षेत्रात करिअरची वाट निवडली. गेल्या 27 वर्षांत त्यांनी कार्पोरेट क्षेत्रातील हजारो लोगो डिझाईन केले आहेत. कलाक्षेत्रातही त्यांचे योगदान मोठे आहे. ‘झेंडूचे फूल’या नाटकासाठी महाराष्ट्र शासनाचा सर्वोत्कृष्ट लिखाणाचा पुरस्कार त्यांना प्राप्त झाला आहे. नाट्यलेखन, दिग्दर्शन आणि नेपथ्यनिर्मिती अशा विविध कलाक्षेत्रांत कार्यरत असलेल्या पाटील यांनी आपल्या अनुभवातून आणि कलात्मक जाणिवेतून कृषी विभागाचा हा नवा लोगो साकारला आहे. सोमवार, 10 रोजी त्यांनी तयार केलेल्या बोधचिन्ह व घोषवाक्य यांचे अनावरण मुंबई येथे मंत्रालयात करण्यात आले. विरेद्र पाटील यांच्यामुळे भुसावच्या नावलौकीकात भर पडली असून त्यांच्यावर सर्व स्तरातून शुभेच्छांचा वर्षाव होत आहे.
