भुसावळात पोलिसांची ‘ड्रंक अँड ड्राईव्ह’ मोहिम : 11 मद्यपी वाहन धारकांवर कारवाई तर शंभर वाहन धारकांना दंड
Police’s ‘Drunk and Drive’ campaign in Bhusawal : Action taken against 11 drunk drivers, fined to 100 drivers भुसावळ (11 नोव्हेंबर 2025) : भुसावळ शहरातील गांधी पुतळा व बस स्थानक परिसरात रविवार, 9 नोव्हेंबर) संध्याकाळी सात ते रात्री 11 वाजेपर्यंत पोलिसांतर्फे‘ड्रंक अँड ड्राईव्ह’ मोहिम राबवली. या मोहिमेत एकूण 11 मद्यपी वाहनधारकांना कायद्याचा दणका देण्यात आला. मद्यपींवर कायदेशीर प्रक्रिया राबविण्यात आली. या सर्वांना न्यायालयात हजर राहण्याच्या लेखी सूचना वाहतूक शाखेचे निरीक्षक उमेश महाले यांनी दिल्या आहेत.
शहरात पोलिसांची धडक कारवाई
पालिका निवडणुकीच्या पार्श्वभूमीवर शहरात कायदा आणि सुव्यवस्था राखण्यासाठी पोलिसांनी वाहन तपासणी, ड्रंक अँड ड्राईव्ह, तसेच कागदपत्र पडताळणी मोहिम अधिक गतीने सुरू केली आहे. रविवारीच्या मोहिमेत मद्यधुंद अवस्थेत वाहन चालविणार्‍या 11 वाहनधारकांवर थेट कारवाई करण्यात आली तर अन्य 100 वाहनधारकांवर विविध नियमांचे उल्लंघन केल्याबद्दल प्रत्येकी 500 रुपयांचा दंड आकारण्यात आला. या कारवाईत शहर पोलीस ठाणे आणि बाजारपेठ पोलीस ठाण्याचे कर्मचारी सहभागी झाले होते.
डीवायएसपी संदीप गावीत यांच्या मार्गदर्शनाखाली ही मोहीम राबविण्यात आली. निवडणुकीच्या काळात शहरातील प्रमुख चौक, महामार्ग व गर्दीच्या भागात दररोज अशा तपासण्या घेण्यात येणार असल्याचे पोलिसांकडून सांगण्यात आले. पोलिसांनी वाहनधारकांना आवाहन केले आहे की, मद्यप्राशनानंतर वाहन चालवू नये, वाहतूक नियमांचे पालन करावे आणि शहरातील शांतता व सुरक्षितता अबाधित ठेवण्यासाठी सहकार्य करावे.
