भुसावळात 15 नोव्हेंबरला होणारी महिला सायकलपटूंची स्पर्धा तांत्रिक अडचणीमुळे पुढे ढकलली
Women’s cycling competition scheduled for November 15 in Bhusawal postponed due to technical difficulties भुसावळ (13 नोव्हेंबर 2025) : जळगाव जिल्ह्यातील महिला सायकलपटूंसाठी अस्मिता खेलो इंडिया वूमेन्स सायकलिंग लीग या जिल्हास्तरीय स्पर्धेचे आयोजन भुसावळ येथे येत्या 15 नोव्हेंबर रोजी करण्यात आले होते मात्र ही स्पर्धा तांत्रिक अडचणींमुळे पुढे ढकलण्यात आल्याची माहिती आयोजकांनी दिली आहे.
दोन गटांमध्ये होणार होती स्पर्धा
वूमेन्स ईलिट (खुला गट) -2006 पर्यंत जन्म झालेल्या खेळाडूंसाठी आणि वुमेन्स जूनिअर (ज्युनिअर गट) – 2007 व 2008 साली जन्म झालेल्या मुलींसाठी स्पर्धेत सहभागी होण्यासाठी इच्छुक सायकलपटूंनी आपले ऑनलाईन रजिस्ट्रेशन करून केआयडी क्रमांक मिळवणे आवश्यक आहे.
महिलांना सायकलिंग खेळात प्रोत्साहन देणे आणि नवोदित सायकलपटूंना राष्ट्रीय स्तरावर संधी मिळवून देणे हा या उपक्रमाचा उद्देश आहे. जळगाव जिल्ह्यात प्रथमच इतक्या मोठ्या प्रमाणात महिला सायकलिंग लीगचे आयोजन होत असल्याने खेळाडू तसेच क्रीडाप्रेमींत उत्साहाचे वातावरण आहे. या स्पर्धेचे आयोजन राष्ट्रीय सायकलिंग महासंघ, खेलो इंडिया, सायकलिंग असोसिएशन ऑफ महाराष्ट्र आणि जिल्हा सायकलिंग असोसिएशन, जळगावतर्फे करण्यात आले आहे. आयोजन समितीने सुरक्षेपासून वैद्यकीय सुविधा, नाश्ता व जलपान व्यवस्थेपर्यंत सर्व बाबींचे नियोजन केले आहे.
नोंदणी करण्याचे आवाहन
तांत्रिक कारणामुळे नोव्हेंबर ऐवजी डिसेंबर महिन्यात स्पर्धा होणार असून नोंदणी करण्याचे आवाहन आयोजकांनी केले आहे. विजेत्या महिला सायकलपटूंना सन्मानचिन्ह, पदक आणि प्रमाणपत्रांसह राष्ट्रीय व आंतरराष्ट्रीय स्तरावर स्पर्धेत सहभागी होण्याची संधी मिळेल, असे क्रीडा शिक्षक प्रदीप साखरे यांनी कळविले आहे.
