चोर्‍या रोखण्यासाठी 35 गाड्यांमध्ये स्वतंत्र गस्त : भुसावळात लोहमार्ग पोलिस अधीक्षक स्वाती भोर
भुसावळ (14 नोव्हेंबर 2025) : रेल्वे गाड्यांमधील वाढत्या चोरीच्या घटनांवर अंकुश ठेवण्यासाठी लोहमार्ग पोलिसांनी विशेष मोहीम सुरू केली आहे. ज्या गाड्यांमध्ये वारंवार चोरीच्या तक्रारी येत होत्या, अशा 35 गाड्यांची स्वतंत्र यादी तयार करून त्यामध्ये गस्त वाढवण्यात आल्याची माहिती लोहमार्ग पोलीस अधीक्षक स्वाती भोर यांनी दिली.
या मार्गावर वाढवली गस्त
अधीक्षक भोर यांनी सांगितले की, थंडीचे प्रमाण वाढल्यामुळे प्रवाशांना झोप लागून जाते त्यामुळे चोरट्यांना वाव मिळतो. त्यामुळे जनरल डब्यांपासून ते वातानुकूलित डब्यांपर्यंत प्रत्येक डब्यात लोहमार्ग पोलीस आणि आरपीएफ कर्मचारी गस्त घालत आहेत. भुसावळ विभागात शेगाव-भुसावळ, भुसावळ-मनमाड, तसेच मनमाड-पुणे-मुंबई या मार्गांवरही गस्त वाढवण्यात आली आहे. सीसीटीव्ही कॅमेर्‍यांच्या माध्यमातूनही संशयितांवर नजर ठेवली जात आहे. अनेक मोठे गुन्हे सीसीटीव्हीच्या मदतीने उघडकीस आले असून, यामुळे प्रवाशांचा विश्वास वाढला आहे. संभाजीनगर-नांदेड या मार्गावर तसेच इतर सिंगल लाईन रूटवर पोलिसांचे फिक्स पॉईंट लावले असून, चोरटे सिग्नल लाल करून गाडी थांबवण्याचे प्रकार रोखण्यासाठीही पोलीस यंत्रणा सज्ज आहे. भुसावळ रेल्वे जंक्शन हे मध्य रेल्वेतील प्रमुख स्टेशन असून, येथे दररोज असंख्य गाड्या ये-जा करतात.
भुसावळ रेल्वे पोलिस सदैव सतर्क असून, सीसीटीव्ही व गस्त यांच्या मदतीने स्थानक परिसरातील गुन्हेगारीत मोठी घट झाली आहे. प्रवाशांचा प्रवास सुखकर व सुरक्षित व्हावा यासाठी लोहमार्ग पोलीस प्रशासन सज्ज असल्याचे अधीक्षक भोर यांनी सांगितले.
यावेळी पोलीस निरीक्षक सुधीर धायरकर उपस्थित होते.
वार्षिक तपासणी
पोलिस अधीक्षक स्वाती भोर या येथील लोहमार्ग पोलिस ठाण्याची वार्षिक तपासणी करण्यासाठी आल्य असता त्यांनी गुन्ह्याचा आढावा घेत, मुद्देमाल तपासणी केली, पोलिस ठाण्याची पाहणी केली. यावेळी पोलिस कर्मचार्‍यांचा दरबार घेत त्यांच्या समस्या जाणून घेतल्यात. त्यांच्या समस्यांचे निराकरण करण्यात आले. यावेळी गुन्ह्याबाबत तपासाच्या दष्टीने सूचना केल्यात. पोलिस निरीक्षक सुधीर धायरकर यांनी पोलिस ठाण्याची माहिती दिली. गुन्हेगार, हिस्ट्रीसीटर यांची माहिती घेतली.
