A minor was served alcohol in Sakli village: The child was upset, a complaint was filed with the Yaval police. यावल (14 नोव्हेंबर 2025) : यावल तालुक्यातील साकळी या गावातील डॉ.आंबेडकर नगरातील रहिवाशी 11 वर्षीय बालकाला शिरसाड येथील वाळू वाहतूक करणार्‍या ट्रॅक्टर चालकांनी आपल्या सोबत बसवून नेले व त्याला दारू पाजली. दारू पाजल्यामुळे सदर बालक हा अस्वस्थ झाल्याने ट्रॅक्टर चालकांनी त्याला सोडून पळ काढला. अस्वस्थ असलेल्या बालकाला नागरिकांनी त्याच्या घरी पोहोचवले. दरम्यान हा बालक बेशुद्ध पडल्यामुळे कुटुंबाकडून त्याला तातडीने यावल ग्रामीण रुग्णालयात दाखल केले असून बालक अस्वस्थ आहे. याबाबत सदर बालकाच्या पालकांनी यावल पोलिसात तक्रार दिली आहे.
पोलिसात दिली तक्रार
साकळी गावातील भारतरत्न डॉ. बाबासाहेब आंबेडकर नगरात दीपेश मुरलीधर भालेराव (11) हा बालक राहतो. हा बालक बुधवारी सकाळी आपल्या घराच्या बाहेर खेळत होता. शिरसाड या गावातील वाळू वाहतूक करणार्‍या अज्ञात ट्रॅक्टर चालकांनी या बालकाला आपल्यासोबत नेले व त्याला त्यांनी दारू पाजली. या बालकाला दारू पाजल्यामुळे तो अस्वस्थ झाला आणि बेशुद्ध पडला.
त्याला सोडून सदर ट्रॅक्टर चालकांनी पळ काढला. नागरिकांनी या बालकाला पाहिले असता त्याला तातडीने त्याच्या घरी पोहोचवले. बालक अस्वस्थ असल्यामुळे त्याला तातडीने यावल ग्रामीण रुग्णालयामध्ये उपचारा करीता आणण्यात आले. बालक सध्या अस्वस्थ असून त्याच्यावर यावल ग्रामीण रुग्णालयात वैद्यकिय अधिकारी डॉ. तुषार सोनवणे, अधिपरिचारिका आरती कोल्हे यांच्या वतीने उपचार सुरू आहे. याप्रकरणी सदर बालकाच्या पालकांकडून यावल पोलिसात अज्ञात ट्रॅक्टर चालकांविरुद्ध तक्रार देण्यात आली आहे.
