Property worth Rs 1.5 lakh looted in daring house burglary in Bhusawal भुसावळ (15 नोव्हेंबर 2025) : भुसावळ शहरातील पंचमसिंह दादारोड, मोठे पोस्ट ऑफिसजवळील घरात अज्ञात चोरट्याने घरफोडी करीत एक लाख 53 हजार रुपये किंमतीचे सोन्या-चांदीचे दागिने लांबवले. या प्रकरणी बाजारपेठ पोलिसात गुन्हा दाखल करण्यात आला.
काय घडले शहरात ?
प्रतापसिंह नंदकुमारसिंह ठाकुर (46) यांनी दिलेल्या फिर्यादीनुसार, 22 ऑक्टोबर रोजी संध्याकाळी 5.30 वाजता ते 13 नोव्हेंबर 2025 रोजी सकाळी 8.30 वाजेपर्यंत त्यांच्या घराला कुलूप लावून ते बाहेरगावी गेले होते. याच वेळात अज्ञात चोरट्याने संधी साधत घराचे कुलूप तोडून घरात चोरी केली.
चोरट्याने घरातून तीन तोळे वजनाचे सोन्याचे मंगळसूत्र, पाच ग्रॅमची सोन्याची अंगठी, तीन ग्रॅम वजनाची एक सोन्याची अंगठी, चार चांदीचे कडे असे मिळून एकूण एक लाख 53 हजार रुपये किंमतीचे दागिने चोरून नेले. गावाहून आल्यावर चोरीची घटना उघडकीस आली. यावेळी ठाकू यांनी बाजारपेठ पोलिसात दिलेल्या फिर्यादीवरून चोरीचा गुन्हा दाखल केला आहे.
घटनास्थळी डीवायएसपी संदीप गावीत, निरीक्षक राहुल वाघ यांनी भेट देऊन पाहाणी केली. पोलिस उपनिरीक्षक राजु सांगळे यांनी पंचनामा केला. पोलिसांकडून या भागातील सीसीटिव्ही फुटेज पहाणी सुरू केली आहे. पोलिसांकडून संशयीताचा शोध घेतला जात आहे.
