महिलांच्या डब्यातून प्रवास : 130 प्रवाशांवर भुसावळ जंक्शनवर दंडात्मक कारवाई
Traveling in women’s compartment: Penal action against 130 passengers at Bhusawal Junction भुसावळ (16 नोव्हेंबर 2025) : मध्य रेल्वेच्या भुसावळ विभागात महिलांच्या सुरक्षित प्रवासाला प्राधान्य देत ऑक्टोबर महिन्यात मोठी कारवाई करण्यात आली. महिलांसाठी राखीव डब्यात अनधिकृतपणे प्रवास करणार्‍या तब्बल 130 प्रवाशांवर तिकीट तपासणी पथकाने दंडात्मक कारवाई केली. ही कारवाई भुसावळ रेल्वे जंक्शनवर विविध गाड्यांमध्ये तपासणीदरम्यान करण्यात आली असल्याची माहिती रेल्वे सुरक्षा बलाचे निरीक्षक पी.आर.मीना यांनी दिली.
महिला डब्यात घुसखोरी करणार्‍यांना आता जेलची हवा
महिलांच्या डब्यात पुरुष प्रवाशांनी प्रवेश करू नये, यासाठी रेल्वे प्रशासन सातत्याने जनजागृती करत असते मात्र नियमाकडे दुर्लक्ष करणार्‍या प्रवाशांना आता दंडाच्या माध्यमातून कठोर संदेश देण्यात आला आहे. महिला प्रवाशांना सुरक्षित, सुलभ आणि अडथळामुक्त प्रवास मिळावा, यासाठी ही मोहीम ऑक्टोबर महिन्यात विशेषतः राबवण्यात आली. रेल्वे सुरक्षा बलातर्फे भुसावळ जंक्शनवर येणार्‍या रेल्वे गाड्याच्या महिला कोचमध्ये तपासणी केली जाते. यावेळी महिलांच्या डब्यात बसलेल्या पुरूष प्रवाशांना उतरवून घेत त्याच्या विरूध्द कारवाई केली जाते. त्यांना न्यायालयात हजार केले जाते. तेथे त्यांना दंड झाल्यावर त्यांना सोडून दिले जाते.
आगामी काळात कठोर कारवाई होणार
रेल्वे सुरक्षा बलाचे वरिष्ठ आयुक्त चित्रेश जोशी यांनी संपूर्ण विभागात महिलांच्या डब्यात घुसखोरी करणार्‍यांविरूध्द कारवाई करण्याच्या सूचना रेल्वे सुरक्षा बलाच्या निरीक्षकांना दिल्या आहे. यामुळे भुसावळसह विभागात सुध्दा महिलांच्या डब्यात तपासणी केली जात आहे. असे रेल्वे सुरक्षा बलातर्फे सांगण्यात आले आहे. रेल्वे प्रशासनाने सांगितले की, महिलांच्या डब्यात अनधिकृत प्रवेश रोखण्यासाठी अशी मोहीम नियमितपणे सुरू राहणार आहे. प्रवाशांनी नियमांचे काटेकोर पालन करावे आणि रेल्वे प्रशासनाला सहकार्य करावे, असे आवाहन करण्यात आले आहे.
