Fake Rs 500 notes worth 5.43 lakh seized in Malegaon मालेगाव (16 नोव्हेंबर 2025) : मालेगावच्या किल्ला पोलिसांनी गोपनीय माहितीद्वारे बनावट दोटा बाळगणार्‍या धनराज नारायण धोटे (रा.कानगाव) व राहुल कृष्णराव आंबटकर (रा. सावजीनगर) यांना अटक केली आहे. आरोपी वर्धा जिल्ह्यातील असून त्यांच्याकडून पाच लाख 43 हजार 500 रुपयांच्या 1087 बनावट नोटा तर 13 हजारांच्या खर्‍या नोटा जप्त करण्यात आल्या.
गर्दीची संधी साधून चलनात आणल्या बनावट नोटा
आठवडी बाजारातील गर्दीचा फायदा घेत आरोपी हे दुकानांमधून वस्तू खरेदी करून बनावट नोटा चलनात आणत होते. त्यांची वेगळी बोलीभाषा व हालचाली संशयास्पद वाटल्याने काही नागरिकांनी पोलिसांना माहिती दिली. पोलिस निरीक्षक सुधीर पाटील यांनी पथकासह त्यांचा शोध घेतला. हे तरुण तांबा काटा परिसरात फिरताना सापडले. त्यांच्याजवळील दोन बॅगांमध्ये बनावट नोटा सापडल्या. यादरम्यान संशयितांचा वर्धा येथील साथीदार प्रिंटरसह फरार झाला आहे.
35 लाखांच्या नकली नोटा जप्त
या कारवाईपूर्वी 29 ऑक्टोबर 2025 रोजी मालेगाव तालुका पोलिसांनी मध्य प्रदेशमधील मौलाना जुबेर अन्सारी, नजीर अन्सारी, तौसिफ अंजुम अन्सारी, अमजद शहाबुद्दीन कोतवाल यांना 10 लाखाच्या बनावट नोटांसह अटक केली. मास्टरमाइंड डॉ.प्रतीक नौलखा फरार आहे. या आरोपींचा ताबा घेण्यासाठी मध्य प्रदेश पोलिसांनी मालेगावच्या न्यायालयात अर्ज दिला आहे. या दरम्यान, खंडवा पोलिसांनी जुबेरच्या घरातून 19 लाख 78 हजारांच्या बनावट नोटा जप्त केल्या.
आरोपी वर्ध्यात नोटांची छपाई करायचे आणि इतर जिल्ह्यांमध्ये त्या चलनात आणायचे. आठ महिन्यांपासून त्यांचा नाशिक जिल्ह्यात वावर होता. मालेगावच्या आठवडी बाजारात दुकानांमध्ये गर्दी व रस्त्यांवर वाहतुकीची कोंडी असे दर शुक्रवारचे चित्र असते. हीच संधी साधत आरोपींनी बनावट नोटा चलनात आणण्यासाठी मालेगावची निवड केली.
