भुसावळ पालिका निवडणूक : 191 मतदान केंद्रांची डीवायएसपीसह गोपनीय विभागाकडून पाहणी
निवडणुकीत बंदोबस्तासाठी काटेकोर नियोजन
Bhusawal Municipal Election: Inspection of 191 polling stations by DYSP and Confidential Department भुसावळ (18 नोव्हेंबर 2025) : भुसावळ पालिका निवडणुकीच्या पार्श्वभूमीवर शहरातील सुरक्षा यंत्रणा सज्ज झाली आहे. एकूण 191 मतदान केंद्रांची डीवायएसपी संदीप गावीत यांच्यासह गोपनीय शाखेकडून सखोल पाहणी करण्यात आली. निवडणूक प्रक्रियेदरम्यान कोणताही अनुचित प्रकार घडू नये आणि मतदारांनी निर्धास्त वातावरणात मतदान करता यावे, यासाठी पोलिसांनी काटेकोर बंदोबस्ताचे नियोजन आखले आहे.
मतदान केंद्राचा सविस्तर आढावा
पोलिस दलाकडून मतदान केंद्रांच्या इमारतींची स्थिती, परिसरातील प्रवेशद्वारे, निकासी मार्ग, संभाव्य अडचणी, संवेदनशील क्षेत्रांची नोंद, तसेच अतिरिक्त फोर्स तैनात करण्याची गरज याचा सविस्तर आढावा घेण्यात आला. काही केंद्रांवर प्रकाश सुविधा, सीसीटीव्ही, सार्वजनिक वाहतूक, पार्किंग व गर्दी व्यवस्थापन या बाबींची खातरजमा करण्यात आली. डीवायएसपी गावीत यांच्या नेतृत्वाखालील पथकाने खडका रोड, जाम मोहल्ला भागातील केंद्रांवर विशेष लक्ष केंद्रित करून सुरक्षेची पातळी वाढवण्याचे निर्देश दिले. निवडणूक दिवसासाठी पोलिस, एसआरपी, आरसीपी प्लॉटून, होमगार्ड, गस्त पथके यांच्या तैनातीचे नियोजन अंतिम टप्प्यात आहे
शहरातील प्रमुख चौकांवर अतिरिक्त नाकेबंदीचे नियोजन करण्यात आले. दरम्यान, मतदान केंद्रांच्या आसपास गर्दी टाळण्यासाठी स्वतंत्र पथकांची नियुक्ती तसेच वाहतूक नियंत्रणासाठी विशेष पोलिस बंदोबस्त ठेवण्याचे ठरविण्यात आले. मतदान दिवशी कोणतीही गडबड होऊ नये म्हणून पोलिसांकडून सतत गस्त व सीसीटिव्ही कॅमेर्‍यांच्या माध्यमातून मॉनिटरिंग ठेवले जाणार आहे.
निवडणुकीच्या काळात शांतता व सुव्यवस्था अबाधित ठेवण्यासाठी नागरिकांनी प्रशासनाशी सहकार्य करण्याचे आवाहन पोलिसांकडून करण्यात आले आहे. यावेळी बाजारपेठ निरीक्षक राहुल वाघ, शहर निरीक्षक उध्दव डमाळे यांच्यासह गोपनिय विभागातील कर्मचारी सोबत होते.
