मुक्ताईनगरात नेत्यांची प्रतिष्ठा पणाला : शिंदे गटाविरोधात भाजपाची सरळ लढत
नगराध्यक्ष पदासाठी दुरंगी तर नगरसेवक पदासाठी तिरंगी-चौरंगी लढत रंगणार !
मुक्ताईनगर (22 नोव्हेंबर 2025) : मुक्ताईनगरात निवडणुकीचा आखाडा तापला असून राष्ट्रवादी शरदचंद्र पवार गटाने उमेदवार न दिल्याची खेळी खेळल्यानंतर कार्यकर्त्यांनी भाजपात प्रवेश केला तर दुसरीकडे आमदार चंद्रकांत पाटील यांनी आपले पत्ते खुले करीत कन्या संजना पाटील यांना नगराध्यक्ष पदाच्या उमेदवार जाहीर केल्याने येथे प्रचंड चुरस निर्माण झाली. शुक्रवारी माघारीच्या शेवटच्या दिवशी नगराध्यक्षाच्या शर्यतीत नसलेल्या पाच पैकी तीन उमेदवारांनी माघार घेतल्याने येथे भाजपा व शिवसेना शिंदे गटात सरळ लढत होईल. भाजपाच्या भावना ललित महाजन यांची शिवसेना शिंउे गटाच्या संजना चंद्रकांत पाटील यांच्यात तुल्यबळ लढत होईल. मुक्ताईनगरात लढत नगरपंचायतीची असलीतरी या निवडणुकीत नेत्यांची प्रतिष्ठा पणाला लागली आहे.
मंत्री रक्षा खडसेंच्या नेतृत्वात निवडणूक
माघारीच्या दिवशी नगरसेवक पदासाठी 17 प्रभागातून 66 पैकी 9 जणांनी माधार घेतल्याने आता 17 जागांसाठी 57 उमेदवार रिंगणात आहेत. राष्ट्रवादीचे आमदार एकनाथराव खडसे यांनी राष्ट्रवादी काँग्रेस शरद पवार गटाची शहरात अपेक्षित ताकद नसल्याची गुगली टाकत उमेदवार न दिल्याने त्यांच्या कार्यकर्त्यांनी भाजपात प्रवेश करीत निवडणूक आखाडा तापवला आहे. या निवडणुकीत केंद्रीय
राज्यमंत्री रक्षा खडसे आणि आमदार चंद्रकांत पाटील यांच्यासाठी ही निवडणूक राजकीय ताकदीचे प्रदर्शन ठरणार आहे.
सरळ व चुरशीची लढत होणार
नगराध्यक्ष पदासाठी दाखल झालेल्या उमेदवारी अर्जापैकी शिवसेना (उद्धव बाळासाहेब ठाकरे), राष्ट्रवादी काँग्रेस पार्टी (अजित पवार गट) आणि एका अपक्ष उमेदवाराने माघार घेतल्याने नगराध्यक्ष पदासाठी भाजप व शिवसेना शिंदे गटात तुल्यबळ लढत होईल.
नगरसेवक पदासाठी दुहेरी, तिरंगी लढत
प्रभाग क्रमांक, तीन, सहा, आठ, वहा, तेरा, चौदा, सोळामधून उमेदवारांनी शेवटच्या दिवशी उमेदवारी अर्ज मागे घेतल्याने आता 17 प्रभागातून 57 उमेदवार नशीब आजमावत आहेत. काही प्रभागांमध्ये प्रमुख दोन पक्षांमध्ये दुहेरी लढत पाहायला मिळेल तर काही प्रभागांमध्ये माधारीनंतरही अपक्ष उमेदवारांचे आव्हान कायम राहिल्याने तिथे तिरंगी लढतीची शक्यता आहे. त्यामुळे प्रत्येक प्रभागातील समीकरणे आता स्थानिक कार्यकत्यांच्या कामावर आणि मतांच्या विभागणीवर अवलंबून असतील.
