Veteran actor Dharmendra passes away मुंबई (24 नोव्हेंबर 2025) : ज्येष्ठ सिने अभिनेते धर्मेंद्र यांचे सोमवारी प्रदीर्घ आजाराने निधन झाले. ते 89 वर्षांचे होते. त्यांनी मुंबईतील आपल्या राहत्या घरी अखेरचा श्वास घेतला. काही दिवसांपूर्वीच त्यांची प्रकृती खालावल्यानंतर त्यांना उपचारार्थ हलवल्यानंतर त्यांच्या निधनाची बातमी सोशल मिडीयात ट्रेंण्ड झाल्यानंतर धर्मेंद्र यांच्या कुटूंबियांनी तीव्र संताप व्यक्त केला होता.
मुंबईत घेतला अखेरचा श्वास
ज्येष्ठ अभिनेते धर्मेंद्र यांनी सोमवारी दुपारी त्यांच्या घरी अखेरचा श्वास घेतला. त्यांच्या मृतदेहावर अंत्यसंस्कार विले पार्ले स्मशानभूमीत करण्यात आले. यावेळी सिने अभिनेते सलमान खान, संजय दत्त, अमिताभ बच्चन आणि आमिर खान यांच्यासह अनेक सेलिब्रिटी उपस्थित होते. पंतप्रधान नरेंद्र मोदी यांनी ज्येष्ठ अभिनेते धर्मेंद्र यांच्या निधनाला एका युगाच्या अंताचे चिन्ह म्हटले आहे.
नेत्यांनीही व्यक्त केल्या संवेदना
राष्ट्रवादी काँग्रेस पार्टी शरदचंद्र पवार पक्षाचे अध्यक्ष शरद पवार, मनसे अध्यक्ष राज ठाकरे, काँग्रेस नेते विजय वडेट्टीवार यांच्यासह अनेक नेत्यांनी धर्मेंद्र यांच्या निधनावर शोक व्यक्त केला आहे. धर्मेंद्र यांच्या रुपाने सिनेसृष्टीने एक अतिशय देखणा, सुदृढ, मोहक हास्य, मर्दानीपणा असणारा, पण त्यात कुठेही दांडगाई नसणारा हिरो गमावला, अशी भावना या नेत्यांनी व्यक्त केली आहे.
