गिरीशभाऊ तुमचा उद्योग वेगळा…! : मुख्यमंत्र्यांच्या विधानाने वेधले लक्ष ; काय घडले भुसावळात
गणेश वाघ
Girishbhau, your industry is different…!: Chief Minister’s statement draws attention; What happened in Bhusawal? भुसावळ (24 नोव्हेंबर 2025) : जळगाव जिल्ह्यातील पालिका निवडणुकीत उभ्या असलेल्या भाजपा उमेदवारांच्या प्रचारार्थ मुख्यमंत्री देवेंद्र फडणवीस यांची सोमवारी सायंकाळी भुसावळात प्रचार सभा झाली. वस्त्रोद्योग मंत्री संजय सावकारे यांनी भाषणात भुसावळातील टेक्स टाईल पार्क मंत्री महाजनांनी पळवल्याचे सांगत भुसावळात टेक्सटाईल पार्कची मागणी केली. सावकारे यांच्या मागणीची दखल घेत फडणवीस यांनी भाषणात सांगितले की, गिरीशभाऊ तुम्ही भुसावळला शिरण्याचा प्रयत्न करू नका कारण तुमचा उद्योग वेगळा, आहे असे म्हणताच उपस्थितांमध्ये खसखस पिकली.
काय म्हणाले मुख्यमंत्री ?
वस्त्रोद्योग मंत्री सावकारे यांनी आपण वस्त्रोद्योग मंत्री असतानाही टेक्सटाईल पार्क जामनेरात गेल्याची खंत व्यक्त करीत मुख्यमंत्र्यांनी भुसावळात एमआयडीसी टेक्सटाईल पार्क देण्याची मागणी केली.
मुख्यमंत्र्यांनी भाषणात मंत्री संजय सावकारे यांच्या मागणीचा धागा पकडत सांगितले की, संजूभाऊंचा सातत्याने एक मात्र आग्रह आहे की, मी टेक्सटाईल मंत्री आहे अन् माझ्या भुसावळात टेक्सटाईल नाही, तुम्ही काहीतरी करा आणि मध्येच गिरीशभाऊ तुम्ही भुसावळात शिरण्याचा प्रयत्न करू नका, म्हणजे तसं शिरा कारण तुम्ही त्या रस्त्यावरच आहात (अर्थात जामनेरात), तुम्हाला शिरावेच लागेल, तुम्ही आमचे नेतेच आहात पण तुमचा उद्योग वेगळा ! म्हणजे टेक्सटाईलचा अन् यांचा उद्योग टेक्सटाईलचा वेगळा त्यामुळे संजूभाऊ मी जानेवारी महिन्यात डावोसला जातो आहे आणि तेथून परत आल्यानंतर भुसावळसाठी किमान एकतरी उद्योग आणल्याशिवाय आपण स्वस्त बसणार नाही व त्यासाठी सर्व पुढाकार मी घेईल, असेही मुख्यमंत्र्यांनी सांगितले.
मंत्री महाजन म्हणाले, आता रस्ता सहा पदरी
मंत्री सावकारे यांच्या भाषणाचा धागा पकडत मंत्री महाजन मनोगत व्यक्त करताना म्हणाले की, टेक्सटाईल पार्क भुसावळात असला की जामनेरात सारखेच आहे. आता तर रस्ता सहा पदरी झाला आहे व 15 मिनिटात जामनेरात पोहोचता येईल. प्रचार सभेतील तीन नेत्यांच्या तीन विधानांची चांगलीच चर्चा सर्वत्र रंगताना दिसली.
