मुख्यमंत्री देवेंद्र फडणवीसांच्या दौर्यामुळे मंत्री संजय सावकारेंना मिळाले बळ !
गणेश वाघ
भुसावळ (25 नोव्हेंबर 2025) : राज्यातील नगरपालिका निवडणुकांच्या अनुषंगाने मुख्यमंत्री देवेंद्र फडणवीस राज्याच्या दौर्यावर आहेत. जळगाव जिल्ह्यात सोमवारी केवळ भुसावळात एक सभा त्यांनी घेत त्यांनी जिल्हाभरातील भाजपेयीं व निवडणूक रिंगणातील उमेदवारांचा उत्साह वाढवला. मुख्यमंत्र्यांच्या चार मिनिटांच्या भाषणाचे अवलोकन केल्यानंतर त्यांचा संपूर्ण फोकस खरा तर मंत्री संजय सावकारे यांच्यावरच राहिल्याचे दिसून येते. या माध्यमातून मुख्यमंत्र्यांनी मंत्री सावकारे यांना बळ दिल्याचे व मुख्यमंत्री त्यांच्या पाठीशी असल्याचा सूचक संदेशही दिल्याचे बोलले जात आहे. घराणेशाहीची टीका खोडून काढताना त्यांनी नगराध्यक्षपद आरक्षित झाल्यानंतर भाजपाने सर्वे केला व त्यात रजनी सावकारेंचे नाव पहिल्यास्थानी आल्यानेच भाजपाने त्यांना उमेदवारी दिल्याचे सांगून विरोधकांना गपगार करण्याचा प्रयत्न केला.
अवघ्या चार मिनिटांच्या भाषणात मुख्यमंत्र्यांचा फोकस खरे तर मंत्री सावकारे यांच्या भोवतालीच राहिला. त्यांच्या भाषणातील मुद्द्यांचे केलेले अवलोकन असे-
सर्वेत प्रथम आल्याने रजनी सावकारेंना तिकीट
भुसावळात नगराध्यक्ष पदाचे आरक्षण एस.सी.प्रवर्गाचे झाल्यानंतर विरोधकांनी मंत्री सावकारेंवर पत्नीला तिकीट देत घराणेशाहीचा आरोप केला. मुख्यमंत्र्यांनी भाषणात सावकारे यांनी तिकीट मागितले नाही तर पक्षाने केलेल्या सर्वेत रजनी सावकाने प्रथम आल्याने त्यांना स्वतःच पक्षाने तिकीट दिल्याचे सांगून विरोधकांचे टीकेला डॅमेज कंट्रोल करीत उत्तर दिले.
देवाभाऊ असेपर्यंत लाडकी बहिण योजना सुरू राहणार
भाजपाला सत्तेवर आणण्यासाठी महत्वपूर्ण ठरलेली लाडकी बहिण योजना बंद होणार असल्याच्या वल्गनांना ब्रेक लावण्यासाठी मुख्यमंत्र्यांनी पुन्हा या योजनेवर भाष्य करीत योजना देवाभाऊ असेपर्यंत बंद होणार नसल्याचे सांगितले अर्थात निवडणुकीत लाडकी बहिणींचे मतदान या माध्यमातून मिळवण्याचा भाजपाचा प्रयत्न.
मंत्री सावकारेंना बळ : महाजनांना म्हणाले भुसावळात शिरकाव करू नका
मंत्री सावकारे यांचा उल्लेख संजूभाऊ असा करीत त्यांनी त्यांच्या प्रत्येक मागण्यांची दखल घेत त्या पूर्ण केल्याचे सांगून मुख्यमंत्र्यांनी सावकारे हे त्यांचे खास व जवळचे नेते असल्याचा संदेश देण्याचा प्रयत्न मुख्यमंत्र्यांनी केला. सावकारेंचे वाढते वलय पाहता मंत्री महाजनांनी भुसावळात शिरकाव करू नये, असा सूचक संदेशही मंत्री महाजनांना देण्याचा प्रयत्न केला.
विरोधकांवर टीका टाळली : विकासाचे ब्लू प्रिंट मांडले
चार वर्षांपासून पालिकेवर प्रशासक असलेतरी त्यापूर्वीच्या पाच वर्ष आधी पालिकेवर भाजपाची एकहाती सत्ता असल्याने विरोधकांवर टीका करण्यासारखे फारसे नसल्याने त्यांनी विरोधकांवर आम्ही टीका करणार नसल्याचे सांगत भुसावळसाठी अमृत योजनेतून 11 महिन्यात 24 तास पाणी देण्याचे तसेच अंडर ग्राऊंड ड्रेनेज करण्याचे आश्वासन दिले. शहर विकासाच्या मुद्यांवर लक्ष केंद्रीत केले.
भुसावळात उद्योग आणण्याची ग्वाही
भुसावळातील टेक्स टाईल पार्क जामनेरात पळवल्यानंतर मंत्री सावकारे यांनी त्या खात्याचा मंत्री असतानाही टेक्स टाईल भुसावळात नसल्याची खंत व्यक्त केल्यानंतर मुख्यमंत्र्यांनी जानेवारीत डावोसहून परतल्यानंतर एकतरी उद्योग आणण्याची ग्वाही दिली. अर्थात भुसावळात उद्योग आल्यास या माध्यमातून बेरोजगारांना रोजगार मिळेल व बेरोजगारी वाढत असतानाही मंत्री सावकारेंकडून कुठलेही प्रयत्न नसल्याच्या आरोपांना ब्रेक लागेल.
एकहाती सत्ता : मोदींच्या विकासाचे व्हिजन
राज्यासह केंद्रात भाजपाचे सरकार असल्याने भुसावळात भाजपाची सत्ता आलयास पालिकेतही सत्ता दिल्यास शहरात विकासकामे करण्याचा मार्ग सुखर होईल, असे सांगण्याचा प्रयत्न फडणवीसांनी केला. पंतप्रधान नरेंद्र मोदींच्या नेतृत्वात सुरू असलेल्या विकासाचे व्हिजन व दृष्टीने पालिकेत चांगले काम होईल, असे सांगण्याचा यातून प्रयत्न. आरोग्य विषयक योजनांची वाढवलेल्या व्याप्तीतून नागरिकांच्या आरोग्यासाठी सरकार बांधील असल्याचे सांगण्याचा प्रयत्न.
