भुसावळात दरोड्यापूर्वीच एमपीतील पाच संशयीतांना अटक
गावठी कट्टा, दोन जिवंत काडतूस व चॉपरसह तीन दुचाकी जप्त
Five suspects from MP arrested before robbery in Bhusawal भुसावळ (28 नोव्हेंबर 2025) : तीन दुचाकीवरून फिरत असलेल्या संशयीतांच्या हालचाली संशयास्पद वाटल्यानंतर बाजारपेठ पोलिसांनी पाठलाग करून तिघांना पकडले होते तर आरोपींचे अन्य पाच साथीदार पसार झाल्याची घटना बुधवार, 26 रोजी रात्री घडली होती. पोलिसांनी मध्यरात्री शोधमोहिम राबवत पाच आरोपींना अटक केली. आरोपींकडून गावठी कट्टा, चॉपर तसेच तीन विना क्रमांकाच्या दुचाकी जप्त करण्यात आल्या. आरोपी शहरात दरोड्याच्या उद्देशाने आल्याने बाजारपेठ पोलिसात त्यांच्याविरोधात गुन्हा दाखल करण्यात आला.
संशय आल्यानंतर तीन आरोपींना पकडले
भुसावळ बाजारपेठ पोलिसांचे अधिकारी व गुन्हे शोध पथक बुधवारी रात्री गस्तीवर असताना काही संशयीत दुचाकीवरून फिरत असल्याची माहिती पोलिसांना मिळाल्यानंतर पथकाने काळा हनुमान मंदिराजवळील भाजी मार्केट परिसरातून पाठलाग करून शुभम दुर्गाप्रसाद ओनकर (24, पोखरण उभरी, तहसील खिडकीया, जि.हरदा), राजू भगवानदास माणिक (29, खिडकीया, जि.हरदा) व मृत्यूंजय सत्येंद्रप्रसाद कविशेखर (43, वॉर्ड क्रमांक 30, बंगाली कॉलनी, जि.हरदा) यांना ताब्यात घेतल्यानंतर त्यांच्याकडून गावठी पिस्टल, दोन जिवंत काडतुसे, चॉपर, मिरची स्प्रे तसेच तीन विना नंबरच्या पल्सर व अपाचे मोटारसायकली जप्त करण्यात आल्या. आरोपींचे पाच साथीदार पसार झाल्यानंतर चौकशीदरम्यान त्यांनी नावे सांगितल्यानंतर अरुण रंधे व तेजस टकले (दोन्ही रा.भुसावळ) यांनाही अटक करण्यात आली तर अन्य पसार आरोपींचा कसून शोध सुरू आहे. अटकेतील आरोपींना न्यायालयाने पाच दिवसांची पोलिस कोठडी सुनावली आहे.
पाच आरोपींसह 13 संशयीतांविरोधात दरोड्याचा गुन्हा
चौकशीदरम्यान आरोपींनी मध्यप्रदेशातून भुसावळात दरोडा टाकण्यासाठी आल्याची माहिती दिली आहे. स्थानिक टीपरने त्यांना शहरातील सराफ बाजार आणि काही बंगल्यांची माहिती दिल्याचे समजते. आरोपींचे आणखी काही साथीदार असून त्यांची नावे तपासार्थ पोलिसांनी उघड केलेली नाही तसेच शोध पथक पसार आरोपींचा व स्थानिक माहिती पुरवणार्‍यांचा शोध घेत आहेत. हवालदार विजय बळीराम नेरकर यांच्या फिर्यादीवरून आरोपींविरोधात गुन्हा दाखल करण्यात आला आहे.
