जळगावात वाळू माफिया शिरजोर : तलाठ्यावर ‘टॉमी’ने वार करून जीवे मारण्याचा प्रयत्न : त्रिकूटाविरोधात गुन्हा
Sand mafia in full swing in Jalgaon : Attempt to kill Talathi by stabbing him with ‘Tommy’ : Crime against trio जळगाव (2 डिसेंबर 2025) : विना परवाना वाळूची अवैधरित्या वाहतूक करणार्या ट्रॅक्टरवर कारवाई करणार्या ग्राम महसूल अधिकारी अर्थात तलाठ्यावर वाळू माफियांनी हल्ला केल्याचा प्रकार सोमवार, 1 रोजी दुपारी साडेतीन वाजता खंडेराव नगरात घडला. राजू कडू बार्हे (53) असे जखमी तलाठ्याचे नाव आहे. या प्रकरणी वाळू माफिया मनोज रमेश भालेराव, फैजल खान आणि चालकाविरुद्ध गुन्हा दाखल करण्यात आला.
काय घडले जळगाव शहरात ?
जळगाव शहरातील पिंप्राळ्याचे ग्राम महसूल अधिकारी राजू बार्हे हे खंडेराव नगराकडून तलाठी कार्यालयाकडे जात असताना गणपती मंदिराजवळून त्यांना विना क्रमांकाच्या ट्रॅक्टरमधून वाळूचा उपसा होत असल्याचे दिसले. त्यांनी वाळूने भरलेल्या ट्रॅक्टर थांबवून चालकाकडे परवान्याबाबत विचारणा केली.
यावेळी ट्रॅक्टरच्या मागून दुचाकीवरुन यापुर्वी वाळू वाहतुकीची कारवाई केलेला मनोज भालेराव हा त्याचा मित्र फैजल याच्यासोबत तेथे आला. त्याने तुमचे नेहमीचेच झाले आहे, हे ट्रॅक्टर माझेच असून यापूर्वीदेखील जमा केले होते असे म्हणत त्याने बुवा म्हणत ट्रॅक्टर घेवून जाण्यास सांगितले. ग्राम महसूल अधिकारी बार्हे हे ट्रॅक्टरला आडवे होवून ट्रॅक्टर अडवित असतांना मनोज भालेराव हा त्यांच्या अंगावर धावून गेला. त्याने बार्हे यांची कॉलर पकडून त्यांच्या कानशिलात लगावली आणि त्यांना ढकलून दिले. तसेच जोरजोरात अश्लिल शिवीगाळ देखील करु लागला.
तिघांविरोधात गुन्हा
ग्राम महसूल अधिकार्याच्या कानशिलात लगावल्यानंतर वाळू माफिया भालेराव याने त्याच वेळेस तुला मारुन टाकायला पाहिजे होते, असे म्हणत फैजल खान याला टॉमीने मारण्यास सांगितले. त्यानुसार फैजल याने बार्हे यांच्यावर टॉमीने हल्ला केला परंतु बार्हे हे बाजूला सरकल्यामुळे चालक ट्रॅक्टर घेवून पसार झाला. ही घटना घडल्यानंतर ग्राम महसुल अधिकारी हे सहकार्यांना फोन करुन सांगत असतांना, त्याठिकाणी नागरिकांनी गर्दी होत असल्याचे दिसताच वाळू माफिया पसार झाले. ग्राम महसूल अधिकारी यांनी पोलिसात दिलेल्या तक्रारीवरुन संशयित मनोज सुरेश भालेराव, फैजल खान व ट्रॅक्टर चालक यांच्याविरुद्ध गुन्हा दाखल करण्यात आला.
