जळगावात उद्यापासून तीन दिवस रंगणार बालक पालकांसाठीचा ‘गंमत जंमत’ बालचित्रपट महोत्सव

जळगाव (23 एप्रिल 2026) : परीक्षा संपल्यानंतर लागणार्‍या सुट्टीत बालकांच्या मनोरंजनासोबतच त्यांच्यावर उत्तम संस्कार व्हावेत आणि त्यांना जागतिक दर्जाचे सिनेमे पाहता यावेत तसेच पाल्यांसोबत पालकांनादेखील आपले बालपण अनुभवता यावे या उद्देशाने जळगावात 24, 25 आणि 26 एप्रिल असा तीन दिवसीय ‘गंमत जंमत’ बालचित्रपट महोत्सवाचे आयोजन शहरातील भाऊंचे उद्यानातील एम्फी थिएटर येथे करण्यात आले आहे.

अजिंठा फिल्म सोसायटी जळगाव, बालरंगभूमी परिषद आणि रिफ्लेक्शन फाऊंडेशन संचलित पालकशाळा यांच्या संयुक्त विद्यमाने हा महोत्सव संपन्न होणार आहे. या महोत्सवास प्रवेश विनामूल्य आहे.
24, 25 आणि 26 एप्रिल दररोज सायंकाळी 6.30 वाजता होणार्‍या या गंमत जंमत बालचित्रपट महोत्सवात आजच्या डिजिटल युगात मुले मोबाईल आणि सोशल मीडियामध्ये व्यग्र असणार्‍या बालकांना मोठ्या पडद्यावर दर्जेदार, प्रबोधनात्मक आणि आशयघन असणारे मनोरंजनात्मक चित्रपट पाहण्याची संधी मिळणार आहे. या महोत्सवाचे उद्घाटन शुक्रवार, 24 एप्रिल रोजी सायंकाळी 6.30 वाजता महापौर दीपमाला काळे यांच्याहस्ते होणार आहे.

चित्रपट हे शिक्षणाचे आणि प्रबोधनाचे एक प्रभावी माध्यम आहे. मनोरंजनातून व्यक्तिमत्व विकास साधण्यासाठी हा एक सुवर्णयोग आहे, त्यामुळे जळगावमधील जास्तीत-जास्त बालक-पालकांनी या चित्रपट महोत्सवाचा लाभ घ्यावा, असे आवाहन आयोजकांतर्फे करण्यात आले आहे.