एक रेल्वे तिकीटावर मूळ ओळखपत्र अनिवार्य : रेल्वेची विशेष मोहिम

भुसावळ (मंगळवार, 29 सप्टेंबर 2026) : रेल्वे प्रवाशांच्या तिकिटांची सत्यता आणि वैधता तपासण्यावर प्रशासनाने आता भर दिला आहे. या नुसार आता एका रेल्वे तिकीटासोबत मूळ ओळखपत्र अनिवार्य करण्यात आले असून रेल्वे या संदर्भात 1 ते 31 ऑक्टोबर 2026 या कालावधीत तिकीट तपासणीची एक विशेष मोहीम राबवणार असल्याचे जाहीर केले आहे. रेल्वे स्थानकांवर आणि रेल्वे प्रवासादरम्यान तिकिटांची तपासणी करण्यासोबतच, सवलतीच्या दरातील तिकिटे, विशिष्ट आरक्षण कोटा आणि विविध पासद्वारे आरक्षित केलेल्या तिकिटांवर या मोहिमेत विशेष लक्ष केंद्रित केले जाणार आहे.

मूळ ओळखपत्र आवश्यक
या मोहिमेदरम्यान तिकीट तपासणी कर्मचारी हे सुनिश्चित करतील की, सवलत किंवा विशिष्ट आरक्षण कोट्यांतर्गत प्रवास करणारे प्रवासी त्यांची पात्रता सिद्ध करण्यासाठी आवश्यक असलेले विहित मूळ ओळखपत्र सोबत बाळगत आहेत. एकाच तिकिटावर अनेक प्रवाशांचे आरक्षण असल्यास, त्या तिकिटावरील किमान एका प्रवाशाकडे विहित (नोंदवलेले) मूळ ओळखपत्र असणे अनिवार्य आहे. आवश्यक मूळ पुरावा नसल्यास, लागू नियमांनुसार त्या तिकिटावर प्रवास करणार्‍या सर्व प्रवाशांना वैध तिकिटाशिवाय (विना तिकीट) प्रवास करणारे मानले जाईल. विशिष्ट सवलती किंवा आरक्षण कोट्यांतर्गत प्रवास करणार्‍या प्रवाशांकडे त्यांची पात्रता सिद्ध करणारी विहित मूळ कागदपत्रे आहेत की नाही, याचीही तपासणी केली जाईल. तसेच, ई-पास/पीटीओ वर प्रवास करणार्‍या प्रवाशांना विहित मूळ ओळखपत्र सोबत बाळगणे आवश्यक असेल आणि प्रवासाला सुरुवात करण्यापूर्वी ई-पास/पीटीओ च्या बदल्यात प्रवासासाठी आवश्यक अधिकृत तिकीट/पास मिळवला आहे याची खात्री करावी लागेल. तिकिटांची, विशेषतः अनारक्षित तिकिटांची सत्यता पडताळण्यावरही विशेष लक्ष दिले जाईल; यासाठी आवश्यक तिथे तिकीट तपासणी कर्मचार्‍यांकडून टीटीई अ‍ॅपचा वापर करून प्रमाणीकरण व पडताळणी केली जाईल. आरक्षण सुविधांचा गैरवापर रोखणे, सवलती आणि पासचा फसवणुकीने होणारा वापर थांबवणे आणि रेल्वेच्या महसुलातील गळती रोखणे हा या मोहिमेचा उद्देश आहे.

कागदपत्रे बाळगून प्रवासाचे आवाहन
रेल्वे प्रवाशांनी वैध तिकिटांसह, लागू असल्यास विहित मूळ ओळखपत्र आणि पात्रता कागदपत्रे सोबत घेऊन प्रवास करावा आणि प्रवासादरम्यान तिकीट तपासणी कर्मचार्‍यांना सहकार्य करावे, असे आवाहन करण्यात आले आहे.