भुसावळात २६ ग्रामपंचायतीच्या २८० जागांसाठी ८५१ उमेदवारी अर्ज दाखल

रात्री नऊ वाजेपर्यंत भरले गेले अर्ज, खडक्यात दोन जागा बिनविरोध : कंडारी, दर्यापूर, खडका, कुऱ्हा, पिंप्रीसेकमध्ये सर्वाधिक चुरस

भुसावळ : तालुक्यातील २६ ग्रामपंचायतीच्या २८० जागांसाठी बुधवारी उमेदवारी अर्ज भरण्याच्या अखेरच्या दिवसापर्यंत ८५१ नामनिर्देशन पत्र भरले गेले. बुधवारी सलग दुसऱ्या दिवशीही तहसील कार्यालयात जत्रा भरली होती. बुधवारी सर्वाधिक ५२० अर्ज भरले गेले. रात्री नऊ वाजेपर्यंत उमेदवारी अर्ज भरण्याची प्रक्रिया सुरु होती. हतनूर, आचेगाव, बोहर्डी खुर्द, बोहडी बुद्रूक, वांजोळा, मांडवेदिगर, भिलमळी आदी ठिकाणच्या अर्जांसाठी उशिरापर्यंत गर्दी कायम होती. ग्रामपंचायत निवडणूकीत बुधवारी होणारी गर्दी पाहता सायंकाळी साडेपाच वाजेपर्यंत अर्ज भरण्याचा वेळ दिला होता. दुपारी चारनंतर गर्दी वाढल्याने वेळेपूर्वी आत आलेल्या अर्जदारांची अर्ज भरण्याची प्रक्रिया रात्री नऊ वाजेपर्यंत सुरु होती. प्रामुख्याने हतनूर, आचेगाव, बोहर्डी खुर्द, बोहडी बुद्रूक, वांजोळा, मांडवेदिगर, भिलमळी या लहान गावांच्या उमेदवारी अर्ज भरण्याच्या बुथवर गर्दी नऊ वाजेपर्यंत दिसून आली. तालुक्यातील कुऱ्हे पानाचे, साकेगाव, कंडारी, दर्यापूर, खडका, पिंप्रीसेकम – निंभोरा, फेकरी, साकरी आदी मोठ्या गावांमध्ये उमेदवारी अर्जांचे प्रमाण अधिक आहे. रात्री उशिरापर्यंत गावनिहाय उमेदवारी अर्जांच्या स्थितीची प्रशासकिय प्रक्रिया सुरु होती. रात्री उशिरापर्यंत अर्जदारांच्या समर्थकांचीही गर्दी उशिरापर्यंत कायम होती. वेळची मर्यादा वाढवूनही विलंब झाल्याने प्रशासनाला तारेवरची कसरत करावी लागली.

गावांचे नावे व कंसात अर्जांची संख्या
कुऱ्हे पानाचे (५१), मन्यारखेडा (१४), काहूरखेडा (२१), खंडाळे (१८), किन्ही (२७), कंडारी (६७), फेकरी (४२), पिंपळगाव बुद्रूक (१९), जोगलखेडा भानखेडा (१६), साकेगाव (५७), साकरी (४४), कठोरा बुद्रूक (१३), कठोरा खुर्द (१४), टहाकळी (२५), जाडगाव (१७), आचेगाव (१९), बोहर्डी बुद्रूक (२०), सुसरी (२२), बेलव्हाय (१८), पिंप्रीसेकम (७६), हतनूर (२४), वांजोळा मिरगव्हाण (२४), शिंदी (१३), खडका (९०), मांडवेदिगर (२४), दर्यापूर (७६)