वरणगाव पाणीपुरवठा योजनेवरील स्थगिती अखेर उठवली

नागरीकांना 24 तास पाणी मिळेस्तोवर लढा सुरूच राहणार : माजी नगराध्यक्ष सुनील काळे

भुसावळ : वरणगाव पाणीपुरवठा योजनेवरील स्थगिती अखेर राज्य सरकारने उठवली असून त्याबाबत 6 रोजी सुधारीत सूचना निर्गमीत करण्यात आली आहे. दरम्यान, योजनेवरील स्थगिती उठवण्यासाठी माजी नगराध्यक्ष सुनील काळे औरंगाबाद उच्च न्यायालयात याचिका दाखल केली होती शिवाय अनेक आंदोलनही त्यासाठी करण्यात आले होते. योजनेवरील स्थगिती उठल्याने मुख्यमंत्री उद्धव ठाकरे, माजी मुख्यमंत्री देवेंद्र फडणवीस, पाणीपुरवठा मंत्री पालकमंत्री गुलाबराव पाटील, माजी पालकमंत्री गिरीष महाजन, भाजपा जिल्हाध्यक्ष राजूमामा भोळे, माजी मंत्री आमदार संजय सावकरे, खासदार रक्षा खडसे यांचे माजी नगराध्यक्ष काळे यांनी आभार मानले आहेत.

भाजपाने केली अनेक आंदोलने
तत्कालीन मुख्यमंत्री देवेंद्र फडणवीस व तत्कालीन जलसंपदा मंत्री गिरीश भाऊ महाजन यांनी 13 सप्टेंबर 2019 रोजी 25 कोटी रुपये खर्चाची पाणीपुरवठा योजना मंजूर केली तसेच योजनेच्या पहिल्या टप्प्याचा निधी नगरपरीषदेच्या खात्यावर जमा केला मात्र राज्यात महाविकास आघाडीचे सरकार आल्यानंतर मंजूर योजनेवर स्थगिती आली. योजनेसाठी भारतीय जनता पार्टीच्या वतीने रस्ता रोको आंदोलन, उपोषण तसेच जलसमाधी आंदोलन करून प्रशासनाचे लक्ष वेधण्यात आले. 1 जानेवारी रोजी जिल्हाधिकारी कार्यालयावर मोर्चा काढण्यात येणार होता मात्र जिल्हाधिकारी अभिजीत राऊत यांनी मोर्चा न काढण्याचे आवाहन करीत मंजूर पाणी योजनेचे काम सुरू करण्याचे ठोस आश्वासन देत मान्यतेसाठी प्रस्ताव मंत्रालयात पाठवतो व वर्क ऑर्डर देतो, असे आश्‍वासन दिले होते.