खासदार हिना गावीत यांची पत्रकार परीषदेत माहिती : माजी आमदार रघुवंशी यांच्या आरोपावर उत्तर : भविष्यात आपल्यासमोर उभे राहणार्यांची चिंता नाही
नंदुरबार : जिल्हाधिकारी यांच्यावर मी वैयक्तिक टीका करत नाही, त्यांच्या कार्यपद्धतीवर टीका करीत आहे. येणार्या लोकसभा निवडणुकीत ते माझ्यासमोर उभे राहतील असा त्याचा अर्थ लावला जात आहे, परंतु मी टॉप टेन खासदार माणिकराव गावित तसेच सीनियर आमदार के. सी. पाडवी यांच्यासमोर लढली आहे आणि जिंकली देखील आहे. त्यामुळे भविष्यात माझ्यासमोर कोण उभा राहील ? याची मला परवा नाही. मी केलेल्या कामांवर माझा भरोसा आहे. त्यामुळे लोक ते विसरणार नाही, असा दावा खासदार हिना गावीत यांनी केला. माजी आमदार चंद्रकांत रघुवंशी यांनी पत्रकार परीषदेतील आरोपानंतर सोमवारी त्यांनीदेखील पत्रकार परीषद घेवून बाजू मांडली.
डॉक्टर असल्याने रुग्णांच्या व्यथा ठावूक
माजी आमदार चंद्रकांत रघुवंशी यांनी सोमववारी दुपारी बारा वाजता पत्रकार परीषद घेऊन खासदार हिना गावीत यांच्यावर आरोप केले होते. त्याचा पलटवार करण्यासाठी खासदार हिना गावीत यांनीही दुपारी चार वाजता पत्रकार पराीषद घेऊन रघुवंशी यांच्या आरोपांचे खंडन केले. त्या म्हणाल्या की, राजकारणात येण्याआधी मी आरोग्य शिबिर घेतले तेव्हा अनेक अडचणी लक्षात आल्या, त्या सोडवण्यासाठी राजकीय क्षेत्रात आली आहे. मी स्वतः डॉक्टर असल्याने मला रुग्णांची व्यथा माहित आहे. त्यामुळे जिल्हा प्रशासनाच्या कार्यपद्धतीबाबत मी वारंवार तक्रारी करीत आहे, तेव्हा कुठे यंत्रणा कामाला लागली आहे. माझ्या प्रयत्नांमुळे पंधराशे इंजेक्शन कोविड रूग्णालयाला मिळाले. रोटरी वेलनेस सेंटरसारखे बाहेर विकले नाहीत. असे सांगून खा गावित म्हणाल्या की, माझे शिक्षण हे मेरीटवर झाले आहे, त्या उलट आमदार रघुवंशी यांच्या मुलीसाठी त्यांनी डोनेशन दिले होते, झराळी फार्म हाऊस आणि नगरपालिकेतील कथित भ्रष्टाचार याबाबत जिल्हाधिकार्यांकडे भाजपच्या पदाधिकार्यांनी तक्रारी केल्या आहेत, ते लपवण्यासाठी माजी आमदार चंद्रकांत रघुवंशी हे जिल्हाधिकार्यांची बाजू घेत असल्याचा आरोप खासदार हिना गावीत यांनी केला.
