भुसावळ शहर आक्रोश मोर्चाने दणाणले

संविधान आर्मी संस्थापक अध्यक्ष जगन सोनवणे यांच्या नेतृत्वात भुसावळात अर्धनग्न मोर्चा

भुसावळ : दीपनगरातील इंडीवेल कंपनीने सहाशे कामगारांना थकीत वेतन द्यावे, दीपनगर प्रकल्पात भुसावळ शहर व तालुक्यातील स्थानिक बेरोजगारांना रोजगार मिळावा, भुसावळातील रस्त्यांची दुर्दशा थांबवावी, भुसावळकरांच्या मूलभूत समस्या सोडवाव्यात तसेच रेल्वे हद्दीतील अतिक्रमण धारकांना हक्काची जागा देवून सातबारा त्यांच्या नावावर करावा आदी प्रमुख मागण्यांसाठी संविधान आर्मी संस्थापक अध्यक्ष जगन सोनवणे यांच्या प्रमुख नेतृत्वात शहरात सोमवार, 6 रोजी दुपारी अडीच वाजता अर्धनग्न आंदोलन करण्यात आले. आंदोलकांनी जोरदार घोषणाबाजी केल्याने शहर दणाणले. शहर हद्दीत आंदोलक आल्यानंतर त्यांना ताब्यात घेण्यात आले. रात्री उशीरापर्यंत बाजारपेठ पोलिसात आंदोलकांविरोधात गुन्हा दाखल करण्याची प्रक्रिया सुरू होती.

घोषणाबाजीने शहर दणाणले
मागण्या पूर्ण करा अन्यथा खुर्ची खाली करा, शहराचा विकास झालाच पाहिजे, कामगारांना थकीत वेतन मिळालेच पाहिजे आदी प्रकारच्या घोषणा आंदोलकांनी देत शहर दणाणून सोडले. दीपनगर प्रकल्पापासून शेकडो कामगार पायी चालत जुन्या पालिका कार्यालयासमोर जमले. महामानव डॉ.बाबासाहेब आंबेडकर व छत्रपती शिवाजी महाराज यांच्या पुतळ्याला वंदन करून माजी नगरसेवक जगन सोनवणे यांच्या नेतृत्वात आंदोलनाला सुरूवात करण्यात आली. बसस्थानक, बाजारपेठ पोलीस ठाणेमार्गे आंदोलक शहर पोलीस ठाणे हद्दीत आल्यानंतर त्यांना पोलिसांनी ताब्यात घेतले. रात्री उशिरापर्यंत गुन्हा दाखल करण्याची प्रक्रिया सुरू होती.