भुसावळात बाप्पांनी घालवली कोरोनाची भीती

भुसावळ शहरात 110 तर तालुक्यात 32 मंडळांतर्फे श्रींची स्थापना : सजावटीचे काम पूर्णत्वाकडे

भुसावळ : विघ्नहर्त्या लाडक्या गणरायाचे शुक्रवारी आगमन होत असल्याने पूर्वसंध्येला शहराचा बाजार गजबजल्याचे दिसून आले. श्रींच्या आगमनामुळे बाजारपेठेत नवचैतन्याचे वातावरण निर्माण झाले असून कोरोनाची दुसरी लाट ओसरल्याने यंदा श्रींच्या उत्सवासाठी तरुणाई सरसावली आहे. भुसावळ शहरात 110 तर तालुक्यात 32 मंडळांतर्फे श्रींची स्थापना केली जात आहे. गुरूवारी विघ्नहर्ता गणेशाच्या स्वागताच्या तयारीसाठी हार-फुले, पूजा, फळे, पूजा साहित्य, मिठाई-मोदक, सजावटीचे साहित्य, मूर्ती खरेदीसाठी भाविकांनी शहरातील बाजारपेठेत मोर्दी गर्दी केली होती.

ग्राहकांच्या खरेदीने बाजारपेठेत नवचैतन्य
गेल्या दोन वर्षांपासून कोरोनामुळे बाजारपेठेतील उलाढाल थांबली होती यंदा मात्र दुसरी लाट ओसरल्याने नागरीकांमध्ये उत्साह संचारला आहे. शुक्रवारी जल्लोषात आगमन होत असून पूर्वसंध्येला गुरूवारी शहराचा बाजार ग्राहकांच्या गर्दीने फुलल्याचे दिसून आले. ग्राहकांनी गणेशाची मूर्ती, हार-फुले, दुर्वा, मिठाई-मोदक, विद्युत रोषणाई, आरास, सजावटीचे सामान आदींसह पूजा साहित्य खरेदी केले. शहरातील मुख्य बाजारपेठ असलेला नृसिंह मंदिर रोड, अप्सरा चौक, मरीमाता मंदिर परिसर, गांधी चौक ते मॉडर्न रोड व उत्तर भागातील लोखंडी बोगदा ते महाराणा प्रताप चौकापर्यंत तापी रोडवर गर्दी होती. लाडक्या बाप्पाच्या आगमनाच्या तयारीसाठी कोरोनाची भीती बाजूला सारत भाविक खरेदीसाठी बाजारपेठेत दाखल झाले होते.