विद्यार्थ्यांनी शिक्षणासोबत अन्य स्पर्धांमध्ये भाग घेवून यश मिळवावे

पोलीस उपअधीक्षक सोमनाथ वाघचौरे : विघ्नहर्ता माझा बाप्पा भव्य चित्रकला स्पर्धेचे बक्षीस वितरण उत्साहात

भुसावळ : कोरोनामुळे शाळा-महाविद्यालये बंद असल्याने विद्यार्थ्यांच्या कलागुणांना वाव मिळत नाही मात्र वाणी दाम्पत्याने आयोजित केलेल्या चित्रकला स्पर्धेमुळे विद्यार्थ्यांमधील मरगळ दूर होण्यास मदत झाली असून त्यांच्यातील कलागुणही समोर आले आहे. शहरात असे उपक्रम राबवण्याची आवश्यकता असून विद्यार्थ्यांनी शिक्षणासोबत अन्य खेळ व स्पर्धांमध्ये रूची दाखवून यश मिळवावे, असा आशावाद भुसावळचे पोलीस उपअधीक्षक सोमनाथ वाघचौरे यांनी येथे व्यक्त केला. भुसावळातील नगरसेविका मेघा देवेंद्र वाणी व समाजसेवक देवा वाणी यांनी विद्यार्थ्यांच्या कलागुणांना वाव देण्यासाठी ‘विघ्नहर्ता माझा बाप्पा’ या विषयावर गणेशोत्सवात चित्रकला स्पर्धेचे आयोजन केले होते. या स्पर्धेतील गुणवंतांना नुकतेच पारीतोषिक देवून गौरवण्यात आले. दोन वयोगटात घेण्यात आलेल्या स्पर्धेत 170 स्पर्धकांनी सहभाग नोंदविला. विद्यार्थ्यांना गौरवताना पोलीस उपअधीक्षक वाघचौरे बोलत होते.

दोन्ही वयोगटातील स्पर्धकांचा गौरव
स्पर्धेत यशस्वी झालेल्या प्रथम द्वितीय व तृतीयक्रमांकाच्या दोन्ही वयोगटातील स्पर्धकांना मानचिन्ह व रोख बक्षीस देऊन मान्यवरांच्या हस्ते गौरविण्यात आले तसेच प्रत्येक सहभागी स्पर्धकांना उत्तेजनार्थ बक्षीस देण्यात आले.