भुसावळातील तरुणाचा नशिराबादमध्ये खून : पोलिसांनी केली तिसर्‍या आरोपीला अटक

भुसावळ : भुसावळातील तरुणाचा पूर्व वैमनस्यातून नशिराबाद येथे खून झाल्याची घटना मंगळवार, 21 रोजी सायंकाळी घडली होती. या प्रकरणी दोन आरोपींना गुन्हा घडल्यानंतर अवघ्या काही तासात अटक करण्यात आली होती. या गुन्ह्यात आणखी आरोपी असल्याचा संशय असल्याने पोलिसांनी भुसावळ ते जळगाव महामार्गावरील सीसीटीव्ही फुटेज तपासल्यानंतर आरोपीसोबत आणखी एक संशयीत असल्याचे निष्पन्न केल्यानंतर संशयीताला शनिवारी रात्री अटक करण्यात आली. आवेज बिस्मिल्ला मणियार (20, भुसावळ) असे अटकेतील आरोपीचे नाव आहे.

पूर्व वैमनस्यातून भुसावळातील तरुणाची झाली होती हत्या
भुसावळात गतवर्षी 18 ऑक्टोबर 2020 रोजी संशयीत धम्मप्रियसह अन्य पाच आरोपींनी मो.कैफ (17) या तरुणाची हत्या केली होती. भावाची हत्या करणार्‍यांचा सूड घेण्यासाठी संशयीत मयताचा भाऊ शेख समीर शेख जाकीर (21, पंचशील नगर, भुसावळ) व शेख रेहान शेख नईम (22, पंचशील नगर, भुसावळ) यांनी धम्मप्रिय मनोहर सुरळकर (19, पंचशील नगर, भुसावळ) या तरुणाची 21 रोजी जामिनावर सुटका झाल्यानंतर नशिराबाद उड्डाणपुलाखाली गोळीबार करून तसेच चाकूचे वार करून हत्या केली होती. खुनाच्या घटनेनंतर अवघ्या काही तासात दोघा आरोपींना अटक करण्यात नशिराबाद पोलिसांना यश आले होते.