भुसावळात दिवाळीच्या नावाखाली खंडणी मागितल्यास तक्रार दाखल करा

भुसावळचे पोलीस उपअधीक्षक सोमनाथ वाघचौरे यांची शहरातील डॉक्टरांसह व्यापारी व कारखानदारांना आवाहन

भुसावळ : शहरातील काही प्रतिष्ठीत डॉक्टर्स वा व्यापारी व कारखानदारांकडे
दिवाळीच्या नावाखाली पैसे (वर्गणी) मागितले जात असल्याची गोपनीय माहिती पोलीस प्रशासनाला प्राप्त झाली असून या संदर्भात संबंधितानी न घाबरता पोलीस ठाण्यात येवून गुन्हा दाखल करावा, असे आवाहन पोलीस उपअधीक्षक सोमनाथ वाघचौरे यांनी येथे केले. गुरुवारी बाजारपेठ पोलीस ठाण्यात आयोजित पत्रकार परीषदेत ते बोलत होते. यावेळी बाजारपेठ निरीक्षक दिलीप भागवत उपस्थित होते.

तर खंडणीचा गुन्हा दाखल करणार
पोलीस उपअधीक्षक वाघचौरे म्हणाले की, काही प्रतिष्ठीत डॉक्टर्स व व्यावसायीकांना धार्मिक स्थळे बांधण्याच्या तसेच दिवाळी देण्याच्या नावाखाली पैसे मागितले जात असून तशी गोपनीय माहिती पोलीस प्रशासनाला प्राप्त झाली आहे. ही बाब खंडणी प्रकारात मोडत असल्याने डॉक्टर्स, व्यापारी व कारखानदार व प्रतिष्ठीत नागरीकांनी न घाबरता शहर, बाजारपेठ, तालुका पोलीस ठाण्यातील प्रभारी अधिकारी वा माझ्याशी संपर्क साधून तक्रार नोंदवल्यास दोषींवर खंडणीचा गुन्हा दाखल करून कठोर कारवाई केली जाईल, असे त्यांनी सांगितले. शहरात अवैध सावकारीच्या काही तक्रारी असल्यास त्याबाबतही तक्रार करावी आम्ही सावकारी प्रतिबंधक कलमान्वये गुन्हा दाखल करून लागलीच दखल घेवू, असेही ते म्हणाले.