भुसावळातील समाजसेवक सारंगधर पाटील यांच्यावर शुभेच्छांचा वर्षाव

कोरोनाकाळात दातृत्वातून उमटवला ठसा
देशावर कोरोनाचे संकट आल्यानंतर लॉकडाऊन व संचारबंदी जाहीर करण्यात आली होती. अत्यंत कठीण अशा प्रसंगात वाहतुकीची साधनेही उपलब्ध असतानाही कोरोनामुळे कुणी घराबाहेर पडत नसल्याने प्रवाशांना पायपीट करीतच आपापल्या गावाची वाट धरावी लागली होती. मजल-दरमजल करीत अनेक गोरगरीब मजूर डोक्यावर सामानाचे गठोडे ठेवून जळगावकडून मुक्ताईनगर, वरणगाव, बुलढाण्याकडे निघाल्यानंतर या गरजूंची दोन वेळच्या पोटभर जेवणाची सोय शहरातील सामाजिक कार्यकर्ते तसेच हॉटेल न्यू पंजाब खालसाचे संचालक छोटूभाऊ (सारंगधर) पाटील यांनी त्यावेळी स्व-खर्चातून केली होती. विशेष म्हणजे प्रशासनाने दिलेल्या सूचनांचे पालन करीत अहोरात्र प्रवाशांची भूक भागवून कुठलाही गाजावाजा न करता खर्‍या अर्थाने छोटूभाऊ हे त्यावेळी प्रवाशांचे तारणहार ठरल्याने जिल्ह्यात त्यांच्या कार्याचे कौतुक झाले होते. समाजाचे आपणही देणं लागतो व जेव्हढी शक्य आहे तेव्हढी मदत करण्याचा आपला प्रामाणिक प्रयत्न असल्याचा नम्रतापूर्वक छोटूभाऊ नेहमीच सांगतांना दिसून येतात.