भुसावळ शहर गुन्हेगारीमुक्त करणार : नूतन पोलिस अधीक्षक एम.रामकुमार

भुसावळ : शहरातील वाढत्या गुन्हेगारीवर निश्चितच अंकुश लावण्यात येवून गुन्हेगारांवर कठोर कारवाई करण्यात येईल शिवाय जिल्ह्यात वाढलेल्या दुचाकी चोरींच्या घटना पाहता यासंदर्भात विशेष उपाययोजना राबवण्यात येतील तसेच सरप्राईज चेकींग तसेच नाकाबंदी लावून विशेष पथकांच्या माध्यमातून दुचाकी चोरट्यांचा बंदोबस्त करण्यात येईल, अशी ग्वाही जिल्ह्याचे नूतन पोलिस अधीक्षक एम.रामकुमार यांनी येथे दिली. मंगळवार, 8 रोजी शहरातील तीनही पोलिस ठाण्यांना त्यांनी भेट देत पाहणी केली तसेच भुसावळ शहराची वाहनातूनही त्यांनी पाहणी केली.

पोलिस उपअधीक्षकांकडून गुन्ह्यांचा घेतला आढावा
नूतन पोलिस अधीक्षक एम. रामकुमार यांनी पदभार स्वीकारल्यानंतर शहराला मंगळवारी प्रथमच भेट देत डीवायएसपी कार्यालय, तालुका पोलिस ठाणे, शहर वाहतूक शाखा, शहर पोलिस ठाणे, बाजारपेठ पोलिस ठाण्याला भेट पोलिस उपअधीक्षकांकडून गुन्ह्यांचा आढावा घेतला. यावेळी त्यांच्या समवेत डीवायएसपी सोमनाथ वाघचौरे, निरीक्षक राहुल गायकवाड, तालुक्याचे निरीक्षक विलास शेंडे, शहर वाहतूक शाखेचे निरीक्षक स्वप्निल नाईक, सहायक निरीक्षक मंगेश गोटला, उपनिरीक्षक अंबादास पाथरवट आदी उपस्थित होते.