पळासनेर अपघातातील मृतांच्या वारसांना पाच लाखांची मदत जाहीर

मुंबई : धुळे जिल्ह्यातील पळासनेर येथे मुंबई-आग्रा महामार्गावर ब्रेक फेल झालेल्या कंटेनर अनियंत्रीत होवून झालेल्या अपघातात तब्बल दहा जणांचे प्राण गेल्याची धक्कादायक घटना मंगळवारी सकाळी 11 वाजता घडली होती. या भीषण अपघाताबद्दल मुख्यमंत्री एकनाथ शिंदे यांनी शोक व्यक्त केला असून अपघातातील मृत आणि त्यांच्या कुटुंबिंयाप्रती सहवेदना प्रकट करुन या दुर्दैवी घटनेतील मृतांच्या नातेवाईकांना मुख्यमंत्री सहायता निधीमधून प्रत्येकी पाच लाख रुपयांची मदत मुख्यमंत्री एकनाथ शिंदे यांनी जाहीर केली आहे.

जखमींवर उपचाराचे निर्देश
या अपघाताची माहिती मिळताच मुख्यमंत्री एकनाथ शिंदे यांनी धुळे जिल्ह्याचे जिल्हाधिकारी आणि पोलीस अधीक्षक संजय बारकुंड यांच्याशी दूरध्वनीवर संपर्क साधून या घटनेची माहिती घेतली. अपघातग्रस्तांना तातडीने मदत करण्याच्या सूचना देतानाच जखमींना तात्काळ वैद्यकीय उपचार पुरविण्याचे निर्देशही मुख्यमंत्र्यांनी दिले.