भुसावळात रेल्वे स्थानकात दहशतवादी शिरतात तेव्हा…!

When terrorists enter railway station in Bhusawal…! भुसावळ : रेल्वे स्थानकाच्या दक्षिण बाजूच्या बुकींग कार्यालयानजीक रेल्वे प्रवाशांची वर्दळ सुरू असताना रविवारी सकाळी कुलींच्या वेशात तोंडाला लाल रूमाल बांधून तीन दहशतवादी शिरल्याची माहिती कळताच प्रवाशांचा थरकाप उडाला व पाहता-पाहता प्रवाशांची मोठी गर्दी जमली तर काही क्षणात ही बातमी रेल्वे आरपीएफ व लोहमार्ग पोलिसांना कळताच त्यांनी तातडीने धाव घेतली. यावेळी दोन्ही सुरक्षा यंत्रणांनी प्रवाशांना सतर्कतेच्या सूचना देत अफवा पसरणार नाही याची काळजी घेतली तर जिल्ह्यावरून दंगा काबू पथकासह पोलिस यंत्रणा दाखल झाली. दिड तासाच्या परीश्रमानंतर कथित दशतवाद्यांना ताब्यात घेण्यात सुरक्षणा यंत्रणांना यश आले. अर्थात हा सर्व प्रकार मॉकड्रिल (सतर्कता चाचणी) असल्याचे कळताच प्रवाशांनी सुटकेचा श्वास घेतला. आगामी महापरीनिर्वाण दिन तसेच जळगाावतील पंडित मिश्रा यांच्या आयोजित कथेच्या अनुषंगाने सुरक्षा चाचणी घेण्यात आली व त्यात स्थानिक सुरक्षा यंत्रणा पास झाल्या.

अफवा, धावपळ व सतर्क यंत्रणांची सतर्कता
रविवारी सकाळी 11 वाजेच्या सुमारास कुलींच्या वेषात तीन दहशतवादी दक्षिण बाजूकडील तिकीट बुकींग कार्यालयानजीकच्या कुली रूममध्ये शिरल्याची माहिती प्रवाशांपर्यंत पोहोचताच प्रवाशांमध्ये थरकाप उडाला तर याबाबतची माहिती रेल्वे लोहमार्ग यंत्रणेला कळताच भुसावळ लोहमार्ग पोलीस निरीक्षक विजय घेर्डे यांनी अग्निशमन दल, आरोग्य पथक, बीडीडीएस, रॅपीड अ‍ॅक्शन फोर्स व रेल्वे सुरक्षा बलाला सूचित केले. अवघ्या 15 मिनिटात यंत्रणा दाखल झाली. सुरूवातीला परीसर निर्मनुष्य करण्यात आला तर शस्त्रसज्ज जवानांनी काही क्षणात आश्रयाला लपलेल्या तिघा अतिरेक्यांचा शोध घेत ताब्यात घेतले. सुरूवातीला स्थानकात अतिरेकी शिरल्याची अफवा पसरल्यानंतर प्रवाशांमध्ये काही क्षणापुरता भीती पसरली मात्र नंतर हे केवळ सतर्कतेचे प्रात्यक्षिक (मॉकड्रिल) असल्याचे कळताच प्रवाशांच्या जीवात जीव आला.