खिर्डीत अवैध गावठी दारूमुळे तरुणांचे आयुष्य धोक्यात

खिर्डी : रावेर तालुक्यातील खिर्डी गावात अवैध गावठी दारूचा पूर वाहत असून पोलीस व राज्य उत्पादन शुल्क विभागाकडून कारवाई होत नसल्याने विक्रेत्यांचे फावले आहे. खिर्डी बस स्टँड परिसरात सकाळपासून ते रात्री उशिरापर्यंत खुलेआम देशी व गावठी हातभट्टीची दारू विक्री होते. कामगारवर्ग व नवयुवकांना दारूचे व्यसन लागल्यामुळे युवा पिढी बरबाद होत आहे. देशी व गावठी दारूमुळे अनेकांचे संसार उघड्यावर पडले आहेत तर तरुण वयात महिलावर्गाला विधवा होण्याची वेळ आली आहे.

कष्टाची कमाई गावठी दारूत खर्ची
महिला वर्ग दिवसभर शेतात काबाड कष्ट करून आपल्या घरसंसाराला आर्थिक मदत करण्याचा केविलवाणा प्रयत्न करतांना दिसतात मात्र महिलांना मारहाण करून त्यांना मिळालेले मजुरीचे सर्व पैसे दारूडे दारूवर उडवत आहेत. मूलबाळ उपाशी आणि तळीराम मात्र तुपाशी असे चित्र गावात आहे. काही मुलींना बाप दारुड्या झाल्यामुळे मुलींना शिक्षणापासून वंचित रहावे लागत आहे. शिक्षणाला मुकलेल्या मुली सध्या आपल्या आई सोबत शेतात कामाला जात असून वा केळीचे घड वाहण्यास जात आहेत.