दक्षिण आफ्रिकेत भुसावळच्या धावपटूंनी वेळेआधीच केली मॅरेथॉन पूर्ण

भुसावळ : दक्षिण आफ्रिका येथे नुकत्याच पार पडलेल्या 86 कि.मी. कॉम्रेड मॅरेथॉनमध्ये भुसावळ स्पोर्ट्स अ‍ॅण्ड रनर्स असोसिएशनच्या डॉ. तुषार पाटील व विजय फिरके या धावपटूंनी मॅरेथॉन विहित वेळेच्या आधीच पूर्ण करुन आपली चमक दाखवून दिली. यामध्ये डॉ.तुषार यांनी सलग दुसर्‍यांदा ही मॅरेथॉन पूर्ण केली आहे. सलग दोन वर्ष कॉम्रेड मॅरेथॉनमध्ये पदक प्राप्त करणारे जळगाव जिल्ह्यातील ते एकमेव धावपटू आहेत. त्याशिवाय विजय फिरके यांनी पहिल्याच प्रयत्नात अतिशय सहजपणे विहीत वेळेच्या आधीच हे आव्हानात्मक अंतर पार केले.

अल्टीमेट ह्युमन रेस म्हणून स्पर्धेची ओळख
1750 मीटर उंचीची चढाई असल्याने या स्पर्धेला जागतिक स्तरावर सर्वात आव्हानात्मक व अल्टीमेट ह्युमन रेस म्हणून ओळख आहे. जगातील सर्वात जूनी अशी मॅरेथॉन कॉमरेड्स मॅरेथॉन असून सीएमए बोर्ड, दक्षिण आफ्रिका यांच्या वतीने यावर्षी 97 वी कॉम्रेड मॅरेथॉन डर्बन येथे आयोजित करण्यात आली होती. दक्षिण आफ्रीकेतील वेळेनुसार पहाटे 5.30 वाजता कॉम्रेड मॅरेथॉन डर्बन सेंट्रल पोस्ट ऑफीसपासून सुरू झाली व पिटर्समारीबर्ग ला सायंकाळी 5.30 वाजता समाप्त झाली. 12 तासांची कालमर्यादा असलेल्या या स्पर्धेत डॉ.तुषार पाटील यांनी केवळ 10 तास 35 मिनिटे व 37 सेकंदात ही कामगिरी पूर्ण केली तर विजय फिरके यांनी 11 तास 32 मिनिटे व 26 सेकंदात हे निर्धारित अंतर पूर्ण केले.