वरणगाव बसस्थानक चौकात ट्रॅफिक पोलिसासह शाळेजवळ दामिनी पथकाची नियुक्त करा

वरणगाव : वरणगाव शहरातील बसस्थानक चौक, तिरंगा सर्कल येथे दुपारी शाळा भरताना आणि सुटताना ट्रॅफिक पोलिस आणि शाळेजवळ दामिनी पथक किंवा साध्या वेशातील पोलिसांची नियुक्ती करण्यात यावी अशी मागणी शिवसेना (शिंदे गट) यांच्या वतीने बुधवार, 19 रोजी सहा.पोलीस निरीक्षक भरत चौधरी यांच्याकडे निवेदनाद्वारे करण्यात आली.

पोलीस नियुक्त केल्यास कोंडीची समस्या सुटणार
शिवसेनेच्या वतीने पोलीस निरीक्षक भरत चौधरी यांना देण्यात आलेल्या निवेदनात म्हटले आहे की, 15 जूनपासून शाळा, विद्यालय, महाविद्यालय सुरू झाले आहे. वरणगावसह परिसरातील विद्यार्थी-विद्यार्थिनी वरणगाव येथे मोठ्या प्रमाणात शाळा महाविद्यालयात शिक्षण घेण्यासाठी दररोज ये-जा करत असतात. बसस्थानक चौक तिरंगा सर्कलजवळ दुपारी 11 ते 12 या वेळेत विद्यार्थ्यांची शाळेत जाण्यासाठी आणि तिकडून शाळेतून घरी येण्यासाठी विद्यार्थ्यांची मोठी वर्दळ बस स्थानक चौक तिरंगा सर्कलवर होते. त्यातच मोटरसायकल अवजड वाहन पायी चालणारे यांचीदेखील या ठिकाणी गर्दी असते. गर्दीमुळे विद्यार्थ्यांना या रस्त्यावरून चालणे मुश्किल होते. अशावेळी या ठिकाणी ट्रॅफिक पोलीस नियुक्त केल्यास शाळेत जाणार्‍या येणार्‍या विद्यार्थ्यांना वाट मोकळी होण्यास मदत होईल. दुचाकी वाहनधारकांमध्ये बर्‍याच वेळा या ठिकाणी शाब्दिक चकमक होऊन हाणामारीपर्यंत वाद होतो. राखेचे अवजड डंपर वाहन याच रस्त्यावरून जातात या ठिकाणी छोटे-मोठे अपघात होतात. तिरंगा सर्कल चौकात ट्रॅफिक पोलीस नियुक्ती केल्यास या सर्व गोष्टी थांबतील.

तर सेना स्टाईल आंदोलन
जी.एस.चौधरी विद्यालय आणि महात्मा गांधी विद्यालय परिसरात शाळा भरतेवेळी व सुटतेवेळी रोड रोमिओ यांचा उच्छाद मोठ्या प्रमाणात असतो. या दोन्ही विद्यालयाजवळ साध्या वेशातील पोलीस किंवा दामिनी पथक यांची नियुक्ती केल्यास रोडरोमियोंमध्ये धाक निर्माण होऊन मुलींच्या छेडखानीचे प्रकार थांबतील, असेही सहा.पोलीस निरीक्षक भरत चौधरी यांना दिलेल्या निवेदनात नमूद करण्यात आले आहे. यावर तत्काळ अंमलबजावणी नाही झाल्यास शिवसेना स्टाईल आंदोलन करण्याचा इशाराही देण्यात आला आहे. यावेळी निवेदन देताना भुसावळ विधानसभा प्रमुख संतोष माळी, तालुकाप्रमुख विकास पाटील, संघटक प्रल्हाद माळी, सुनील देवघटोळे यांची उपस्थिती होती.