भुसावळ : भुसावळ रेल्वे स्थानकाबाहेरील पार्किंगमध्ये काम करणार्या तरुणास गावठी कट्ट्याचा धाक दाखवत मारहाण करून दर महिन्याला पाच हजार रुपये खंडणीपोटी हप्ता देण्याची मागणी केल्याप्रकरणी हंसराज खरात व अमोल श्याम खिल्लारे उर्फ चिन्नाविरुद्ध भुसावळ बाजारपेठ पोलिसात गुन्हा दाखल करण्यात आला होता. बुधवारी रात्री 11.30 वाजेच्या सुमारास ही घटना घडल्यानंतर आरोपींना भल्या पहाटे पोलिसांनी कोम्बिंग ऑपरेशन राबवत आरोपींना अटक केली होती. शुक्रवारी आरोपींना भुसावळ सत्र न्यायालयाचे न्या.आर.एस.मानकर यांच्या न्यायालयात हजर केले असता त्यांना 12 पर्यंत तीन दिवसांची पोलिस कोठडी सुनावण्यात आली.
पार्किंगमध्ये काम करणार्या तरुणाकडून मागितली खंडणी
भुसावळ रेल्वे स्थानकाच्या दर्शनी भागात दुचाकी पार्किंगचा मक्ता देण्यात आला असून तेथे काम करणार्या 22 वर्षीय तरुणाला हंसराज खरातसह अमोल श्याम खिल्लारे उर्फ चिन्ना तसेच एका अल्पवयीन संशयीताने गावठी कट्ट्याचा धाक दाखवत मारहाण करीत दर महिन्याला पाच हजार रुपये खंडणीपोटी देण्याची बुधवारी रात्री 11.30 वाजेच्या सुमारास मागणी केली होती तसेच रक्कम देण्यास नकार दिल्याने खिशातील एक हजार 200 रुपयांची रोकड लुटून नेल्याने आरोपींविरुद्ध बाजारपेठ पोलिसात गुन्हा दाखल करण्यात आला होता.
आरोपींना तीन दिवसांची पोलिस कोठडी
बुधवारी पहाटे पोलिसांनी समता नगर परीसरात कोम्बिंग राबवून आरोपींना अटक केली होती. आरोपींना शुक्रवारी भुसावळ न्यायालयात न्या.आर.एस.मानकर यांच्या न्यायासनापुढे हजर केले असता त्यांना 12 पर्यंत पोलिस कोठडी सुनावण्यात आली. सरकारतर्फे सरकारी वकील अॅड.आर.एस.गवई तर आरोपींतर्फे अॅड.सत्यनारायण आर.पाल यांनी काम पाहिले. तपास पोलिस निरीक्षक दिलीप भागवत यांच्या मार्गदर्शनाखाली सहा.निरीक्षक अनिल मोरे, समाधान पाटील करीत आहेत.
