गणेशोत्सवातील सजावट कुटूंबाला एकत्र ठेवते : आमदार संजय सावकारे

रोटरी रेल सिटीच्या गणेशोत्सव स्पर्धेचा पारितोषिक वितरण सोहळा उत्साहात

भुसावळ : सध्याच्या काळात कुटुंबातील सदस्यांनीही एकत्र येणे काळाची गरज आहे. उत्सवकाळात घरातील गणपती समोरील सजावटीच्या निमित्ताने हे सदस्य एकत्र येतात त्यामुळे मुलांवरही चांगले संस्कार होतात, असे मत आमदार संजय सावकारे यांनी व्यक्त केले. भुसावळ रोटरी क्लब ऑफ रेल सिटीतर्फे आयोजित स्व.प्रसन्न देव स्मृती गणेशोत्सव घरगुती सजावट स्पर्धेच्या पारीतोषिक वितरण समारंभप्रसंगी ते बोलत होते. रोटरीचे सहाय्यक प्रांतपाल डॉ गोविंद मंत्री, शिवाजी शिक्षण प्रसारक मंडळाचे डॉ.मकरंद नारखेडे, रेल सिटीचे अध्यक्ष हरविंदरसिंग ठेठी, सचिव आशिष अग्रवाल, प्रोजेक्ट चेअरमन श्रीकांत जोशी व्यासपीठावर उपस्थित होते.

कुटूंबातील एकोप्यासाठीही उत्सवाची गरज
सावकारे पुढे म्हणाले की, आज कुटूंबातील संवाद हरवत आहे. घरात सजावट करायची म्हंटले की, सदस्यांमध्ये संवाद वाढतो. कल्पनांची व विचारांची देवाण-घेवाण होते. लोकमान्य टिळकांनी भारतीयांना एकत्र आणण्यासाठी उत्सव सुरू केले. आता कुटूंबातील एकोप्यासाठीही उत्सवाची गरज आहे. सार्वजनिक मंडळांनी उत्सवकाळात होणारे ध्वनिप्रदूषण थांबवावे तसेच गणेश मूर्ती लहान आणून विविध कार्यक्रमांचे आयोजन करण्यात यावे, असे सावकारे म्हणाले. डॉ.मकरंद नारखेडे, डॉ.गोविंद मंत्री यांचीही भाषणे झाली.