चंद्रकांत पाटील म्हणाले : आज स्व.बाळासाहेब जिवंत असते तर राऊतांच्या थोबाडीत मारली असती !

मुंबई : तुम्हाला झोपताना, उठताना भाजपा दिसतो. एसटी कर्मचार्‍यांचा संप आम्ही सुरू केला, आरोग्य विभागाच्या परीक्षेचा पेपर आम्हीच फोडला, शेतकरी पैसे आम्ही थांबवले, काय चेष्टा चालली आहे, सामान्य माणसाला कळत नाही काय ? सगळीकडे भाजपचा हात आहे असं म्हणता, मग तुम्ही 3 पक्ष समर्थ आहात ना? भाजपचा हात कापून काढा ना तुम्हाला कोणी अडवलं, असे आव्हान भाजपाचे प्रदेशाध्यक्ष चंद्रकांत पाटील यांनी महाविकास आघाडीला दिले आहे. ते म्हणाले की, मला संजय राऊतांचे वक्तव्य ऐकून खूप कीव येत आहे. राजकारणासाठी किती लाचार झालेत, हे दिसतेय. आज स्व.बाळासाहेब जिवंत असते तर एक थोबाडीत मारली असती, अशा शब्दांत भाजपाचे प्रदेशाध्यक्ष चंद्रकांत पाटलांनी शिवसेनेचे राज्यसभा खासदार संजय राऊतांना फटकारले आहे.

एक जेलमध्ये दुसरा हॉस्पिटलमध्ये…
सरकारने दंगली थांबवण्याचा प्रयत्न केला तर खुर्च्या जातील ही भीती वाटत आहे. मग तुम्ही तिघे दुबळे आम्ही सक्षम आहोत. माजी गृहमंत्री जेलमध्ये, एक गृहमंत्री आता आजारपणातून बाहेर पडले, मुख्यमंत्री हॉस्पिटलमध्ये आहेत, पण बाहेरून सरकार चालवणारे मात्र आहेत ना? त्रिपुरात घडलेल्या घटनेचा निषेध अमरावतीत. ही परंपराच आहे. शांततेने करा ना. अमरावतीचा कालचा रीपोर्ट पोलिसांनी प्रामाणिकपणे द्यावा. माजी मंत्री जगदीश गुप्तांचे ऑफिस फोडले गेले नाही का? सामान्य माणसाचे ऑफिस फोडले गेले नाही का? असा सवालही पाटील यांनी केला.