भुसावळात उपमुख्यमंत्र्यांच्या उपस्थितीत राष्ट्रवादीत होणार अनेकांचे ‘इनकमिंग’

भुसावळ : शहरात पालिकेच्या माध्यमातून झालेल्या विकासकामांचे लोकार्पण, भुसावळसह विभागातील भाजपमधील पदाधिकार्‍यांचा राष्ट्रवादीत प्रवेश सोहळ्याच्या निमित्ताने उपमुख्यमंत्री अजित पवार रविवार, 5 डिसेंबर रोजी भुसावळ दौर्‍यावर येत आहेत. यानिमित्त त्यांची शहरातील डॉ. बाबासाहेब आंबेडकर मैदानावर जाहीर सभा होणार आहे. माजी मंत्री एकनाथराव खडसे यांनी गुरुवारी स्वीकृत नगरसेवक प्रा.सुनील नेवे यांच्या ‘अटल’ निवासस्थानी नगरसेवक, पदाधिकार्‍यांच्या बैठकीत ही माहिती दिली. बैठकीत माजी मंत्री खडसेंनी भाजपमधून सध्या राष्ट्रवादीच्या गोटात समाविष्ट झालेल्या नगरसेवकांना या दौर्‍याची माहिती दिली. दरम्यान, उपमुख्यमंत्र्यांच्या उपस्थितीत भाजपासह अन्य पक्षातील कार्यकर्त्यांसह पदाधिकार्‍यांचा राष्ट्रवादीत प्रवेशही होणार आहे त्यामुळे आगामी काळात पालिका निवडणुकीच्या पार्श्वभूमीवर काय-काय समीकरणे बदलतात? याकडे राजकीय समीक्षकांचे लक्ष लागले आहे.

विविध विकासकामांचे उद्घाटनही होणार
भुसावळसह, यावल, रावेर, सावदा, फैजपूर, मुक्ताईनगर व बोदवड येथील अनेक पदाधिकारी, नगरसेवक राष्ट्रवादीत प्रवेश करणार आहेत. भुसावळ शहरात पालिकेच्या माध्यमातून उभारणी झालेले दोन ते तीन पूल, हनुमान नगरातील उद्यान, सरदार वल्लभभाई पटेल पुतळा नूतनीकरण अशा विकासकामांचे उपमुख्यमंत्री अजित पवार यांच्याहस्ते उद्घाटन करण्यात येईल. या दौर्‍याच्या पार्श्वभूमीवर नियोजन बैठक घेवून तयारीला गती देण्यात येईल.