माजी मंत्री खडसे म्हणाले : माजी आमदार अरुण पाटील भाजपात गेल्यानेच करावा लागला पराभव

जळगाव : जिल्हा मध्यवर्ती बँकेत राष्ट्रवादीने वर्चस्व मिळवल्यानंतर पदाधिकार्‍यांमध्ये उत्साह संचारला आहे. त्यात रविवारी उपमुख्यमंत्री अजित पवार यांचा जिल्हा दौरा आणि पक्षाच्या सभासद नोंदणीच्या नियोजनासाठी शनिवारी पक्ष कार्यालयात राष्ट्रवादीच्या जिल्हा बैठक झाली. याप्रसंगी खडसे म्हणाले की, जिल्हा बँक निवडणुकीत यावल, रावेर मतदारसंघात करावे लागलेले चमत्कार हा राजकारणाचा भाग आहे. माजी आमदार अरुण पाटील हे भाजपमध्ये गेल्यात जमा असल्याने त्यांचा पराभव करावा लागला. बँकेत राष्ट्रवादी स्पष्ट बहुमतात आहे. बँकच नव्हे तर मनपातही भाजपला आपणच धक्का दिला आहे. या पुढच्या निवडणुकीत राष्ट्रवादी एकट्याच्या बळावर लढू शकते हे नेत्यांना सिद्ध करून दाखवणार असल्याचेही खडसे म्हणाले.

यांची होती उपस्थिती
यावेळी ज्येष्ठ नेते अरुण गुजराथी, माजी मंत्री एकनाथ खडसे, डॉ. सतीश पाटील, गुलाबराव देवकर, आमदार अनिल पाटील, माजी आमदार दिलीप वाघ, दिलीप सोनवणे, साहेबराव पाटील, मनीष जैन, जिल्हाध्यक्ष अ‍ॅड. रवींद्र पाटील, दूध संघाचे अध्यक्ष अ‍ॅड. वसंतराव मोरे, जिल्हा बँकेच्या अध्यक्षा अ‍ॅड. रोहिणी खडसे, बँकेचे संचालक संजय पवार, नाना राजमल पाटील, घनश्याम अग्रवाल, प्रदेश सरचिटणीस नामदेवराव चौधरी, महिला अध्यक्षा वंदना चौधरी, महानगर अध्यक्ष अशोक लाडवंजारी, महिला अध्यक्षा मंगला पाटील उपस्थित होते.